د خلیج هېوادونه وايي چې د ایران بریدونه ټوله سیمه ګواښي
د خلیج عربي هېوادونو د چارشنبې په ورځ د ملګرو ملتونو د بشري حقونو شورا ته وویل چې دوی د ایران له اړخه له یوه وجودي یا«شتونیز ګواښ» سره مخ دي. یادو هېوادونو پر خپلو بنسټیزو تاسیساتو د ایران بریدونه وغندل.
د ملګرو ملتونو د بشري حقونو مشر ویلي چې دغه بریدونه کېدای شي د جګړې جرمونه وبلل شي.
د کویټ استازي ناصر عبدالله الحیین شورا ته وویل، « موږ د نړیوال او سیمهییز امنیت لپاره یو وجودي ګواښ وینو. دا تېریګر چلند نړیوال قانون او حاکمیت کمزوری کوي».
نورو خلیجي هېوادونو هم د ایران کړنې وغندلې او ویې ویل چې دا کارونه د وېرې خپرولو لپاره کېږي.
په دې ۴۷ کسیزه شورا کې به هېوادونه پر یوې پرېکړې رایې ورکړي چې د ایران بریدونه پکې غندل کېږي، له ایران څخه د تاوان غوښتنه کېږي او له ملګرو ملتونو غوښتل کېږي چې وضعیت وڅاري.
ایران د خپلو کړنو دفاع وکړه او ویې ویل چې تر اوسه د امریکا او اسراییل په بریدونو کې له ۱۵۰۰ ډېر ملکي وګړي وژل شوي دي.
ایران همداراز د یوې بیړنۍ غونډې غوښتنه کړې چې د جمعې په ورځ به و شي او پر یو ابتدایي ښوونځي شوی مرګونی برید به پکې وڅېړل شي.
د ملګرو ملتونو د بشري حقونو مشر ولکر ترک پر هېوادونو غږ وکړ چې د ایران جګړه پای ته ورسوي.
