امریکا: ۱۰ زره بریدونو کې مو د ایران د حکومت دوه پر درېیمه برخه نظامي تاسیسات ویجاړ کړي
د امریکا د مرکزي قوماندانۍ (سنټکام) مشر د ایران د نظامي تاسیساتو د بریدونو د وضعیت په اړه په خپل وروستي راپور کې ویلي، امریکايي پوځ د جګړې له پیل راهیسې په ایران کې له ۱۰ زرو ډېرې موخې په نښه کړې او د ایران د حکومت د نظامي تولیداتو دوه پر درېیمه برخه تاسیسات یې لهمنځه وړي دي.
برډ کوپر په دغه ویډیويي پیغام کې چې د چهارشنبې په ماښام (د وري ۵مه) خپور شو، زیاته کړه: «یوازې څو ساعته وړاندې مو ۱۰۰۰م هدف وویشت او که خپلې لاسته راوړنې د خپل اسراییلي متحد له بریالیتوبونو سره یوځای کړو، نو په مجموع کې مو زرګونه نورې موخې هم په نښه کړې دي. دا په ښکاره ښيي چې کله موږ یو ځای یو، ډېر ځواکمن یو».
کوپر د دغو موخو لهمنځه وړل د «ملموسو پایلو» لرونکي وبلل او زیاته یې کړه، چې د ایران د سمندري ځواک د ۹۲ سلنه لویو کښتیو په ویجاړېدو سره د نړۍ د کښتۍ چلونې پر وړاندې د ایران د جنګي بېړیو د ګواښ پړاو پای ته رسېدلی دی.
کوپر دې ته په اشارې سره چې د جګړې له پیل څخه پر نورو هېوادونو د ایران د توغندیزو او بېپیلوټه الوتکو بریدونه ۹۰ سلنه کم شوي، زیاته کړه چې د خپلو توغندیزو او ډرون وړتیاوو د بیارغونې لپاره د ایران ځواک هم کمزوری شوی دی.
نوموړي د دغې ویډیو په یوه برخه کې د توغندیو او بېپیلوټه الوتکو د تولید د دوه پر درېیمه برخې تاسیساتو، د کښتۍ جوړولو د صنایعو او سمندري تجهیزاتو زیانمن کېدو یا بشپړ ویجاړېدو ته اشاره وکړه او ټینګار یې وکړ، چې د امریکا پوځ د ایران د نظامي تولیداتو د پراخو زېربناوو د «بشپړې نابودۍ» په لور روان دی.
