اکسیوس: ټرمپ تېره اوونۍ د نتنیاهو هغه وړاندیز رد کړ چې ګواکې ایرانیان دې سړکونو ته راووځي
اکسیوس د لوړپوړو امریکایي چارواکو او یوې اسراییلي سرچینې له قوله راپور ورکړی، چې د امریکا ولسمشر ډونالډ ټرمپ تېره اوونۍ د اسراییل د لومړي وزیر بنیامین نتنیاهو هغه وړاندیز رد کړی، چې له مخې یې دواړه هېوادونه په ګډه له ایرانیانو وغواړي چې سړکونو ته راووځي او خپل حکومت نسکور کړي.
د راپور لهمخې، نتنیاهو په یوه ټلیفوني اړیکه کې ټرمپ ته ویلي وو چې د ایران حکومت له ګډوډۍ سره مخ دی او دا یو مناسب فرصت دی چې لا ډېر بېثباته کړل شي. هغه وړاندیز کړی و، چې دواړه لوري دې د ایران له خلکو وغواړي څو سړکونو ته راووځي.
یوه امریکایي چارواکي اکسیوس ته ویلي، ټرمپ ورته په ځواب کې ویلي: «ولې باید له خلکو وغواړو چې سړکونو ته راووځي، په داسې حال کې چې هغوی به یوازې ووژل شي؟».
اکسیوس لیکلي، چې دواړو لوریو هوکړه وکړه چې انتظار وباسي او وګوري چې ایا د چهارشنبې د جشن پر مهال به د ایران خلک سړکونو ته راووځي او که نه. خو راپورونه ښيي، چې یوازې لږ شمېر خلک سړکونو ته وتلي وو؛ هغه موضوع چې امریکایي او اسراییلي چارواکو د حکومت د احتمالي غبرګون له وېرې سره تړلې بللې ده.
په راپور کې راغلي، سره له دې چې اسراییل د ولسي پاڅون لپاره د شرایطو برابرول خپل له اساسي موخو څخه ګڼي، امریکایي چارواکي وایي ټرمپ د ایران د حکومت بدلون ته تر ډېره د یو «اړخیزې پایلې» په توګه ګوري او په عین وخت کې د ډیپلوماټیکې لارې سره هم لېوالتیا لري.
