شهباز شریف پر قطر او د فارس خلیج پر هېوادونو بریدونه وغندل
د پاکستان لومړي وزیر نن ماښام د قطر له امیر شیخ تمیم بن حمد ال ثاني سره ټلیفوني خبرې وکړې. شهباز شریف په سیمه کې د روانو شخړو د دوام په اړه خپله ژوره اندېښنه څرګنده کړه او پر قطر او د فارس خلیج پر نورو هېوادونو شوي بریدونه یې په کلکه وغندل.
د پاکستان لومړي وزیر ټینګار وکړ، چې هېواد یې په ځانګړې توګه په اوسنیو سختو شرایطو کې د قطر له دولت او ولس سره بشپړه همکاري او ملاتړ کوي. په خبرپاڼه کې راغلي، چې شهباز شریف د روانو ترینګلتیاوو پر وړاندې د قطر د "پام وړ زغم" ستاینه وکړه او د دغه هېواد امیر ته یې د تاوتریخوالي کمولو او سولې ټینګښت په برخه کې د پاکستان د ډیپلوماټیکو هڅو ډاډ ورکړ.
نوموړي زیاته کړه، چې پاکستان تل له ټولو لوریو غوښتنه کړې چې خپلې ستونزې د خبرو او ډیپلوماسۍ له لارې حل کړي. له بلې خوا، د قطر امیر هم د سولې او سیمهییز ثبات د ټینګښت لپاره د پاکستان د هڅو مننه کړې.
په پای کې دواړو لوریو هوکړه وکړه، چې په راتلونکو ورځو کې به له یو بل سره د سیمې وضعیت په تړاو نږدې اړیکه وساتي.
