د «اېفاېنسي» د ازادو سیالیو سازمان اعلان کړی، چې د افغانستان د ترکیبي رزمي لوبو مشهور لوبغاړی واحدالله نژند به د ارجنټاین له لوریانو سټاروپولي سره مخ شي. دغه لوبه به د ۷۷ کیلوګرامه وزن په کټګورۍ کې د «اېفاېنسي» سازمان په ۳۰م پړاو سیالیو کې ترسره شي.
ټاکل شوې، چې دواړه لوبغاړي د ۱۴۰۵کال (د غویي په ۱۹مه) له یو بل سره مخامخ شي. نژند چې پخوا یې په اوکټاګون سازمان کې سیالي کړې وه، د ۱۴۰۴کال د مرغومي په وروستیو کې د «اېفاېنسي» سازمان سره یو تړون لاسلیک کړ.
هغه په خپلو ۱۲ مسلکي لوبو کې ۱۰ بریاوې او ۲ ماتې لري، پهداسې حال کې چې د هغه سیال ۱۳ بریاوې او ۷ ماتې لري. نژند په اوکټاګون سازمان کې غوره فعالیت وښود او د خپل وزن په کټګورۍ کې د کال غوره لوبغاړی ونومول شو. هغه اوس په یوه نوي سازمان کې خپله لومړۍ سیالي تجربه کړې، چې څلور پرلهپسې بریاوې لري.
په کابل کې د "بنسټیز فوټبال" مېله د دوه سوه تنو تنکیو لوبغاړو په ګډون ترسره شوه. د افغانستان د فوټبال فدراسیون اعلان کړی، چې دغه جشنواره د دوی په اختصاصي لوبغالي کې د منځنۍ اسیا د فوټبال ټولنې (کافا) په تخنیکي همکارۍ جوړه شوې وه.
د فوټبال فدراسیون د راپور لهمخې، په دغه پروګرام کې د پلازمېنې له بېلابېلو ښوونځیو او کلبونو څخه دوه سوه تنو ماشومانو او تنکیو لوبغاړو ګډون کړی و، چې په یوه منظم او روزنیز چاپېریال کې یې خپل تمرینونه او لوبې ترسره کړې.
د فوټبال فدراسیون ویلي، چې د دې ډول پروګرامونو اساسي موخه د بنسټیز فوټبال وده، د نوو وړتیاوو موندنه او په هېواد کې د فوټبال لا پراختیا ده.
د دې جشنوارې په لړ کې ګډونوال په لسو لوبډلو کې تنظیم شوي وو او په بېلابېلو ډلو کې یې له یو بل سره تمرینونه او سیالۍ وکړې. همدارنګه، بېلابېل پروګرامونه لکه روزنیزې لوبې، مهارتي تمرینونه او دوستانه سیالۍ په یوه خوښ او تفریحي چاپېریال کې ترسره شول.
د افغانستان د بدن ښکلا فدراسیون چارواکي وايي، ټاکل شوې ده چې د یادې څانګې یوه ۲۰ کسیزه لوبډله د سویلي اسیا د بدن ښکلا په ۱۶مه سیالۍ کې په خپل شخصي لګښت ګډون وکړي. دغه سیالۍ به د ۱۴۰۵کال (د چنګاښ په ۹مه) د بوتان په پلازمېنه تیمپو ښار کې پیل شي.
د یاد فدراسیون د عمومي منشي عبدالرحمان حمید په وینا، د بدني روزنې څانګې د یوې لوبې لګښتونه پر غاړه اخیستي؛ خو په دغه ملاتړ کې د سویلي اسیا سیالۍ شاملې نهدي او لوبغاړي په شخصي توګه په دغه سیالیو کې د ګډون لپاره د خپل سفر او ګډون لګښتونه په غاړه اخلي.
ټاکل شوې ده، چې ۱۶ لوبغاړي به له څلورو پلاويو سره په دغه سیالیو کې د افغانستان استازیتوب وکړي. په دغه سیالیو کې به د هند، پاکستان، بنګلهدېش، سریلانکا، نیپال، بوتان، مالدیف او افغانستان په ګډون د سویلي اسیا هېوادونه برخه واخلي.
څه موده وړاندې د افغانستان د بدن ښکلا فدراسیون د دغه سیالیو لپاره د غوره شویو لوبغاړو نوملړ اعلان کړی و.
د افغان لوبغاړو نوملړ:
۱. ریاض الرحمان احسان – غزني ولایت
۲. میوند بابکرخېل – کندوز ولایت
۳. احمد حبیبي – بلخ ولایت
۴. بلال جلیلي – غزني ولایت
۵. فرامز اکرمزاده – بغلان ولایت
۶. حکمتالله علمي – کندهار ولایت
۷. جواد میرزايي – کابل ولایت
۸. محمدعلي حسني – غزني ولایت
۹. محمود متین – فراه ولایت
۱۰. عصمت الله عمري – کابل ولایت
۱۱. ثناالله برهاني – کابل ولایت
۱۲. احمد شجاع محمدي – جوزجان ولایت
۱۳. خواجه رفیع صدیقي – کابل ولایت
۱۴. ملا داد احمدزی – بلخ ولایت
۱۵. نصیبالله عظیمي – بلخ ولایت
۱۶. نایب مبارز – کابل ولایت
د رویټرز خبري اژانس د راپور لهمخې، د هند د کرېکټ غوره لیګ (ایپياېل) د رایل چلنجرز بنګلور لوبډله څو سترو شرکتونو پېرلې ده. په دې شرکتونو کې ادیتیا بیرلا ګروپ، د ټایمز اف انډیا ګروپ، بولټ ونچرز او بلکسټون شامل دي.
د یادې لوبډلې پخواني مالک یونایټډ سپیریټس شرکت د دې کلب د امتیاز د پلور پرېکړه کړې او خپل مالکیت یې بل لوري ته لېږدولی دی.
د هند د کرېکټ غوره لیګ (ایپياېل) لوبډلو ته د پانګهوالو لېوالتیا د دې لیګ د عوایدو د چټک زیاتوالي او بېساري ارزښتموندنې له امله ډېره شوې ده. د پانګونې بانک هولیهان لوکي د معلوماتو لهمخې، د دې لیګ ټولییز ارزښت تېر کال ۱۸.۵ میلیارده ډالرو ته رسېدلی دی.
د دې هوکړې پر بنسټ، اریامان ویکرام بیرلا د یادې لوبډلې د رییس په توګه ټاکل شوی او ساتیان ګجواني د ټایمزاف انډیا ګروپ له لوري د مرستیال رییس دنده پر غاړه لري.
د هند غوره لیګ (ایپياېل) سیالیو پیل ته یوازې پنځه ورځې پاتې دي، چې د افغانستان د کرېکټ نړۍوال ستوری راشد خان له خپلې لوبډلې ګجرات ټایټنز سره یوځای شو. یاد کلب د دې خبر په خپرولو سره ویلي: «په لوبډله کې د خوښۍ فضا خپره ده، ځکه چې د ګجرات ټایټنز ویاړ بېرته خپل ځای ته راستون شو».
راشد خان چې د نړۍ د شل اوریزو او یو ورځنیو (پنځوس اوریزو) سیالیو له غوره توپاچوونکو څخه شمېرل کېږي، د کرېکټ له مشهورو او ډېر مینهوال لرونکو لوبغاړو څخه دی. ټاکل شوې چې نوموړی به ډېر ژر په دې نامتو لیګ کې خپله لسمه دوره پیل کړي.
د کرېکټ دا ۲۸کلن نړۍوال اتل د دغو لوبو په ټولو بڼو کې لوبېږي. هغه د خپل ځانګړي مهارت له امله په څرخوونکې توپاچونه کې په ځانګړي ډول د «ګوګلي» توپونو په اچولو سره ډېر پېژندل کېږي. د ګجرات ټایټنز د کلب په وینا، هغه د شل اوریزو سیالیو له غوره ورو توپاچوونکو څخه دی. نوموړي خپله لومړنۍ نړۍواله یو ورځنۍ لوبه په ۲۰۱۵ کال کې د ۱۷ کلنۍ په عمر د زمبابوې پر وړاندې ترسره کړه او تر اوسه یې ګڼ شمېر نړۍوال ریکارډونه په خپل نوم کړي دي.
۲۰۱۸ کال د هغه د مسلکي ژوند له تر ټولو ځلانده کلونو څخه و، ځکه چې هغه د تاریخ تر ټولو چټک لوبغاړی شو چې په نړۍوالو یو ورځنیو سیالیو کې یې ۱۰۰ وېکټې ترلاسه کړې.
راشد خان په ۲۰۱۷ کال کې د هند غوره لیګ ته داخل شو او له هغه وخته تر اوسه یې خورا ښه لوبه کړې ده. هغه څلور پړاوونه د سنرایزرز حیدراباد لوبډلې لپاره ولوبېد او په ۲۰۱۸ کال کې یې له دې لوبډلې سره د اتلولۍ دویم مقام ترلاسه کړ. همدارنګه، هغه د دې لیګ له هغو چټکو ورو توپاچوونکو څخه دی چې ۱۰۰ وېکټو ته رسېدلی دی.
نوموړي په ۲۰۲۲ کال کې د ګجرات ټایټنز له لوبډلې سره خپله لومړنۍ اتلولي په ایپياېل کې وګټله. سربېره پر دې، هغه په نورو معتبرو سیالیو لکه د اسټرالیا د بیګباش لیګ کې هم برخه اخیستې ده. د ۲۰۲۳ کال په پړاو کې راشد خان خپله لومړنی «هېټټرېک» په ایپياېل کې ثبت کړ. دا بریا یې د کلکته نایټ رایډرز پر وړاندې د احمداباد ښار د نرېندرا مودي په لوبغالي کې ترلاسه کړه.
راشد خان د ایپياېل په ټولییزه دوره کې ۱۳۶ سیالۍ ترسره کړې دي، ۵۸۵ منډې یې جوړې کړې او ۱۵۸ وېکټې یې ترلاسه کړې دي. هغه یو ځل تر ۵۰ډېرې منډې وهلې دي او تر ټولو ښه لاسته راوړنه یې ۷۹ منډې دي.
دا په دې لیګ کې د هغه د ګډون لسم پړاو دی. راشد خان څلور پړاوونه د سنرایزرز حیدراباد لپاره ولوبېد او اوس شپږ پړاوونه کېږي چې د ګجرات ټایټنز برخه دی. هغه په پیل کې د ۹ کروړه هندي روپیو په بیه دې لیګ ته داخل شو، وروسته په ۲۰۲۱ کال کې د ۱۵ کروړه په بدل کې ګجرات ټایټنز ته ولاړ او په ۲۰۲۵ کال کې یې بیه ۱۸ کروړه ته لوړه شوه چې په روان پړاو کې هم همداسې پاتې دی.
په نوي پړاو کې درې نور افغان لوبغاړي هم په ایپياېل کې برخه لري. عظمتالله عمرزی به د پنجاب کینګز لپاره، نوراحمد لکڼوال به د چنای سوپر کینګز لپاره او اللهمحمد غضنفر به د ممبۍ اینډینز لپاره ولوبېږي.
د ایپياېل ۲۰۲۶ سیالۍ د مارچ په ۲۸مه پیلېږي او د مې تر ۳۱مې نېټې پورې به دوام وکړي. په دې سیالیو کې لس لوبډلې برخه لري او د یوه ګروپ په بڼه به له یو بل سره سیالۍ کوي. په ټولیز ډول به ۸۴ لوبې ترسره شي تر څو د دې پړاو اتل وټاکل شي.
د ایپياېل ۲۰۲۶ ګډونوالې لوبډلې:
• چنای سوپر کینګز
• ډهلي کپیټلز
• کلکته نایټ رایډرز
• راجستان رویالز
• رویال چلنجرز بنګلور
• پنجاب کینګز
• ممبۍ اینډینز
• سنرایزرز حیدرآباد
• ګجرات ټایټنز
• لکنو سوپر جاینټز
په پای کې باید وویل شي، چې د ګجرات ټایټنز لوبډله په تېر پړاو کې په څلورم ځای کې راغله او رویال چلنجرز بنګلور بیا اتلولي ګټلې وه.
د افغانستان د فوټبال ملي لوبډله به درې ورځې وروسته د کب په شپږمه نېټه د میانمار د یانګون ښار په "توونا" لوبغالي کې د میانمار د ملي لوبډلې پر وړاندې د کوربه په توګه لوبه وکړي. دا سیالي د ۲۰۲۷ کال د اسیا د ملتونو جام ته د غوراوي پړاو د درېیم پړاو په چوکاټ کې ترسره کېږي.
په داسې حال کې چې پرون د افغانستان د فوټبال ملي لوبډلې وروستۍ تمریني ناسته په کابل کې د برازیلي روزونکي تر څارنې لاندې ترسره شوه، خو د فوټبال فدراسیون تر اوسه د بلل شویو لوبغاړو د شمېر، وروستي نوملړ او د هغوی د هویت په اړه هېڅ ډول رسمي معلومات نه دي خپاره کړي.
رسنیو په حیرانتیا سره لیکلي چې د افغانستان د فوټبال ملي لوبډلې "کورنۍ لوبه" هم د سیال هېواد په لوبغالي کې ترسره کېږي. په دې توګه به د دواړو لوبډلو د تګ او راتګ دواړه لوبې په یوه لوبغالي کې ترسره شي؛ هغه لوبه چې میانمار پهکې کوربه و او هغه لوبه چې افغانستان پهکې کوربه توب کوي.
افغان لوبډله چې له میانمار، کویټ، پاکستان او سوریې سره په یوه ګروپ کې شامله ده، تر دې وړاندې یې خپلې دوه کورنۍ لوبې هم له هېواده بهر ترسره کړې دي. د سوریې پر وړاندې لوبه په سعودي عربستان کې ترسره شوه او د پاکستان پر وړاندې سیالي په کویټ کې وشوه. اوس درېیم کوربهتوب هم په میانمار کې ترسره کېږي، په داسې حال کې چې مخکې ویل کېدل دا لوبه به په بنګلهدېش کې ترسره شي.
افغانستان تر دې مخکې لوبه کې له میانمار څخه په ۲–۱ ماتې خوړلې، د سوریې پر وړاندې هم مات شوی او له پاکستان سره یې په دوو لوبو کې مساوي پایلې درلودې. له دې ګروپ څخه، سوریې له څلورو لوبو څخه د ۱۲ امتیازونو په ترلاسه کولو سره خپل ځای یقیني کړی او پاتې لوبې یوازې تشریفاتي بڼه لري.
سره له دې دا چې یوه لوبډله ونهشي کولای په خپل هېواد کې کوربه وي، یا په نورو هېوادونو کې هم د کوربهتوب لپاره مناسب میدان ونهلري او اړ شي چې د سیال په میدان کې کوربهتوب وکړي، د ملي فوټبال او ان د نورو ورزشي ډګرونو په کچه یو ډېر کمساری او نادره پېښه بلل کېږي.
د افغانستان وروستۍ لوبه په دې پړاو کې به د ۱۴۰۵ کال د کب په یوولسمه نېټه د سوریې پر وړاندې ترسره شي، چې سوریه به د دې لوبې کوربه وي.