د بلوچستان اعلی وزیر: افغان خاوره باید د پاکستان پر ضد ونه کارول شي
د بلوچستان ایالت اعلی وزیر، میر سرفراز بګټي، په برشور ولسوالۍ کې یوې غونډې ته د وینا پر مهال وويل، چې د افغانستان خاوره باید د پاکستان پر ضد ونه کارول شي.
د بلوچستان ایالت اعلی وزیر د سرفراز بګټي، نن جمعه د وري پر ۷مه غونډې ته د وینا په مهال وويل:«چې مونږ له افغان کډوالو سره د خپلې خولې مړۍ ور نیمه کړه او دوي مو وساتل خو د افسوس خبره دا ده چې زمونږ د ښو کړنو بدل او پایله هم هغسې نه ده بلکې له افسوس نه ډکه ده.»
دا څرګندونې په داسې حال کې کېږي، چې پاکستاني چارواکي نیوکه کوي، چې د طالبانو راتګ وروسته په خیبرپښتونخوا او بلوچستان کې وسلوال بریدونه زیات شوي دی او د افغانستان خاوره د پاکستان پرضد کارول کېږي خو د پاکستاني چارواکو دا څرګندونې تل د طالبانو له لوري رد شوي دي.
تېره اوونۍ د اقتصاد او سولې انسټیټیوت د نړیوال تروریزم شاخص په اړه په خپل وروستي راپور کې اعلان وکړ، چې پاکستان د لومړي ځل لپاره له ترهګرۍ څخه د اغیزمنو هیوادونو د نوملړ په سر کې راغلی دی. د راپور له مخې، پاکستان تیر کال تر ټولو ډیر د ترهګریز بریدونو شاهد و.
یاد سازمان وايي چې د ترهګرو ډلو په فعالیت کې د پام وړ زیاتوالی په ۲۰۲۱ کال کې په افغانستان کې واک ته د طالبانو د بیرته راستنېدو پایله ده.
راپور وايي، چې د داعش ډله په نړۍ کې تر ټولو وژونکې ترهګریزه ډله پاتې ده، که څه هم د دوی د فعالیت ساحه له ۲۲ څخه ۱۵ هیوادونو ته راټیټه شوې ده. همدارنګه، جماعت نصرت الاسلام والمسلمین، تحریک طالبان پاکستان او الشباب ډلې د تر ټولو خطرناکو ترهګرو ډلو په توګه بلل شوي دي.
