د بلوچستان په پښین کې د یوې نجلۍ د نه ورکړې له امله د هغې د کورنۍ درې غړي ووژل شول
د بلوچستان ايالت د پښین والسوالۍ په یارو سیمه کې په یوه کور کې د وسلهوالو کسانو لهخوا ډزې شوې، چې له امله یې د یوې ښځې په ګډون درې کسان وژل شوي دي. پولیس وايي، دغه پېښه د نجلۍ د نه ورکړې له کبله رامنځته شوې او د هلک د کورنۍ لهخوا د نجلۍ پر کورنۍ ډزې شوې.
پولیسو زیاته کړې، دغه پېښه د خپلمنځي شخړې له امله رامنځته شوې چې پهکې یوه ښځه ټپي شوې هم ده. د ځایي پولیسو په وینا؛ د یادې پېښې وژل شوي او ټپيان یې د پښین ملکي روغتون ته لېږدولي دي.
تر یادې پېښې وروسته ځايي خلکو په یارو سیمه کې د کویټې-چمن لویه لار د احتجاج په توګه وتړله او له حکومت یې وغوښتل، چې د وژل شویو کسانو قاتلان ژر تر ژره ونیسي. بل لور ته پولیس وايي، چې د پېښې په اړه یې پلټنې روانې دي.
