طالبان: ایراني موټر چلوونکي له دې وروسته افغانستان ته د ننوتلو لپاره ویزې ته اړتیا نه لري
د هرات د طالبانو د والي دفتر اعلان وکړ، چې ایراني لارۍ چلوونکي به له دې وروسته افغانستان ته د ننوتلو لپاره ویزې ته اړتیا ونه لري. طالب چارواکو وویل،چې د هیبت الله اخوندزاده په امر د ایران ټرانزیټ موټرونه به د شنبې له ورځې څخه پرته له ویزې او «پاس» افغانستان ته ننوځي.
په هرات کې د طالبانو د والي دفتر نن د جمعې په ورځ د وري پر ۷مه په اېکس خواله رسنۍ کې لیکلي، چې د دې پریکړې په پلي کیدو سره به د ترانسپورټ کرایې راټیټې شي او د توکو بیې به هم راټیټې شي.
په هرات کې د طالبانو والي اسلام جار د جمعې په ورځ د اسلام کلا سرحدي سیمې څخه لیدنه وکړه؛ ترڅو د دې حکم پلي کیدو څارنه وکړي.
د طالبانو د والي دفتر په وینا، د شنبې په ورځ، ټاکل شوې ده چې بهرني بار وړونکي موټرونه د ویزې او سړک پاسونو اړتیا پرته د اسلام کلا پولې ته ننوځي او د توکو له کښته کولو وروسته بیرته خپلو منزلونو ته راستانه شي.
په خبرپاڼه کې ویل شوي، چې د دې پلان پلي کول کولی شي له یوې خوا کرایې را کمې کړي او له بلې خوا د ترانسپورټ لګښتونو کمولو سره د توکو د بیو په کمولو کې مرسته وکړي. دا هم ویل شوي چې دا پروسه به د زرو څخه زیاتو خلکو ته ورځنی کار برابر کړي.
طالبان او ایران پراخې سوداګریزې اړیکې لري.
له وروستیو سیمه ایزو کړکیچونو څخه دمخه، د دواړو خواوو ترمنځ د سوداګرۍ حجم شاوخوا څلور ملیارد ډالرو ته رسیدلی و.
د افغانستان بازار، په ځانګړې توګه د خوړو، خامو موادو او ساختماني موادو په سکتورونو کې تر ډیره حده په ایراني توکو پورې تړلی دی.
په سیمه کې د کړکیچونو او شخړو له زیاتوالي سره، د افغانستان بازار هم اغیزمن شوی او د ځینو توکو او خامو موادو بیې لوړې شوې دي.
