طالبان وايي په نورستان کې یې پر ډیورڼد کرښه له پرتو پوستو شاتګ نه دی کړی
د طالبانو د ۲۰۱ خالد بن ولید قول اردو ویاند وحیدالله محمدي وايي، چې د نورستان په برګمټال او کامدېش ولسوالیو کې چې ډیورنډ کرښې ته څېرمه دي، له پرتو پوستو شاتګ نه دی کړی. نوموړي وویل:« طالب ځواکونه په خپلو پوستو کې ځای پر ځای دي او د سیمې امنیت د دوی په واک کې دی.»
په ختیځ کې د طالبانو د ۲۰۱ خالد بن ولید قول اردو نن جمعه د وري پر ۷مه یو شمیر د کورنیو رسنیو خبریالان د چرخکې په واسطه د نورستان برګمټال ولسوالۍ ته لېږدولي و.
ځايي خلکو خبریالانو ته ویلي، چې په سیمه کې د طالبانو وسلوال شته دي او د پاکستاني ځواکونو مخکې راتګ یې رد کړ.
له دې وړاندې په ټولنیزو رسنیو کې داسې راپورونه خپاره شول، چې طالبانو د نورستان په برګمټال او کامدېش ولسوالیو کې پوستې پرېښي او پاکستاني ځواکونو له ډیورنډ کرښې دې غاړې ته مخکې تګ کړی دی.
د نورستان د طالبانو د والي ویاند فریدون صمیم د چارشنبې په ورځ تایید کړه، چې پاکستاني ځواکونه پر هغو موټرو بریدونه کوي چې غواړي د کامدیش او برګمټال ولسوالیو ته داخل شي، له همدې امله د دغو دواړو ولسوالیو لارې د ترافیکو پر مخ تړلې دي.
په سیمه کې محلي سرچینو افغانستان انټرنشنل پښتو ته ویلي و، چې کامدیش، برګمټال او د کونړ ناړۍ ولسوالۍ پر یوه لیکه پرتې دي او د نورستان خلک د اکمالاتو لپاره د ناړۍ لار کاروي، خو پاکستاني ځواکونه له غره څخه ډزې کوي او پر لاره موټر نه شي تېرېدای.
د سرچینې په وینا، طالبانو له پارون نه متبادله لاره پیل کړې، خو ددې لارې نښلول ډېر وخت غواړي.
