د هېواد په ۳۰ ولایتونو کې د سختو ورښتونو او زورورو بادونو اټکل شوی
د طالبانو د ترانسپورټ او هوايي چلند وزارت د هوا پوهنې ادارې ویلي، چې سبا یکشنبه د هېواد په ۳۰ ولایتونو کې د سخت باران او تېزو بادونو احتمال شته.
د دغه ادارې د وړاندوینې له مخې، سبا (یکشنبه، د وري۹مه) به هرات، فراه، نیمروز، هلمند، غور، فاریاب، دایکندي، ارزګان، زابل، پکتیکا، پکتیا، خوست، لوګر، غزني، میدان وردک، بامیان، سرپل، کندز، سمنګان، بغلان، پروان، پنجشېر، کاپیسا، کابل، ننګرهار، لغمان، کنړ، نورستان، تخار او بدخشان ولایتونه د باران شاهدان وي.
د هوا پوهنې ادارې د دغو ولایتونو په بېلابېلو سیمو کې د باران اندازه له ۱۰ تر ۴۰ میلیمتره اټکل کړې ده.
دغه ادارې همداراز ویلي چې په لویدیځو، سویلي، ختیځو او مرکزي ولایتونو کې د ۵۰ تر ۹۰کیلومتره په ساعت چټکۍ سره د زورورو بادونو د لګېدو احتمال هم شته.
د یادې ادارې په وینا، د هېواد په لوړو سیمو کې د واورې د ورېدو امکان هم موجود دی.
