د پخواني ولسمشر حامد کرزي د دفتر رییس کریم خُرم وايي، افغانستان او د افغان ملت حیثیت او ګټې د افرادو تر ګټو مهمې دي او له طالبانو یې وغوښتل، چې په ملګرو ملتونو کې د افغانستان د استازولۍ له سرپرست څخه ملاتړ وکړي، څو د پاکستان د تېریو په تړاو نړۍواله دعوا پر مخ یوسي.
کریم خُرم د شنبې په ورځ (د وري ۸مه) په خپله اېکسپاڼه ویلي، پاکستان همدا څو ورځې مخکې په کابل کې د روږدو د درملنې پر مرکز په برید سره لږ تر لږه ۴۰۰ بستري بېګناه کسان ووژل، د افغانستان حاکمیت یې نقض کړ او پر افغان خاوره یې تېری وکړ.
د خُرم په باور، افغانستان د نورو اقداماتو ترڅنگ باید په نړۍوالو اړوندو بنسټونو او د نړۍوالو قوانینو په رڼا کې د خپل حق د اعادې لپاره دعوا اقامه کړي.
کریم خُرم زیاتوي: «ملګري ملتونه د افغانستان فعلي حکومت په رسمیت نهپیژني، خو د افغانستان دولت په رسمیت پېژني، زما په نظر خارجه وزارت دې په ملګرو ملتونو کې د برحاله نماینده ملاتړ وکړي او د ده په واسطه دې دا دعوا په بین المللي سطحه پرمخ بوځي».
نوموړي همداراز څرګنده کړې: «[طالبان] دې دا اعلان کړي چې نوموړی [نصیر احمد فایق] په دې برخه کې د افغانستان د دولت، حکومت او ملت استازیتوب کوي».
هغه همداراز وړاندیز کړی، چې طالبان دې له دې سربېره په کور دننه او بهر کې له حقوقپوهانو مرسته وغواړي، څو د وطن او ملت د حق پوښتنه شوې وي.
طالبان په ملګرو ملتونو کې د افغانستان د استازولۍ سرپرست نصیر احمد فایق د خپلې ډلې استازی نهګڼي او څو ځلي یې په قطر کې د خپلې ډلې سفیر سهیل شاهین یادې څوکۍ ته نوماند او وړاندیز کړ، خو د ملګرو ملتونو له لوري ونهمنل شو.
نصیر احمد فایق له نږدې پنځو کلونو راهیسې د افغانستان په استازیتوب د ملګرو ملتونو، امنیت شورا او نورو اړوندو غونډو کې ګډون او وینا کوي، خو د ۱۴۰۳ کال له غويي میاشتې راهیسې د ملګرو ملتونو د غړیتوب فیس د نهورکړې له امله یې د رایې ورکړې حق ځنډول شوی دی.
د یادونې وړ ده، چې د ملګرو ملتونو هر غړی هېواد هر کال باید د غړیتوب فیس چې شاوخوا ۲۰۰ زره امریکايي ډالره کېږي یاد سازمان ته ورکړي او که دوه پرلهپسې کاله دغه فیس ورنهکړي د رایې ورکړې حق یې ځنډول کېږي.
پخوا به دا پیسې د افغانستان د بهرنیو چارو وزارت ورکولې او افغان پلاوي به د ملګرو ملتونو حساب ته استولې او طالبانو هم په وار وار ویلي، که په ملګرو ملتونو کې یې استازی ومنل شي، حاضر دي د دغه سازمان د غړیتوب فیس تادیه کړي.
یو افغان کډوال وویل:«زموږ مالي امکانات ختم شوي او اوس اړ یو چې له هوټلونو او هټیو څخه په پور خوراکي توکي او نور ضروري شیان واخلو، پر سړک ژوند کول نه یوازې ستونزمن دي بلکې د ماشومانو د خوندیتوب لپاره هم ګواښ دی.»
همداراز په جمرود کې یوې افغانې مېرمنې افغانستان انټرنشنل -پښتو ته وویل، چې د پاکستان او طالبانو تر منځ د روان کړکېچ له امله د پاکستان امنیتي ځواګونو ناسم چلند له امله یې ژوند ډېر سخت شوی او د ژوند څلوېښت کاله یې په پاکستان کې تېر کړي.
د افغان کډوالو نیوکې دا دی، چې لاره تړل شوې خو بیا هم پاکستان په زوره خلک له خپلو کورونو وباسي.
په ننګرهار کې د طالبانو د اطلاعاتو او کلتور ریاست د اطلاعاتو امر، قریشي بدلون،(جمعه، د وري ۷مه) ویلي چې پاکستان تېره شپه یو ځل بیا تورخم د هر ډول تګ راتګ پر مخ وتاړه.
د هغه په وینا، د دې لارې په تړل کېدو سره سلګونه کورنۍ چې افغانستان ته د بېرته ستنېدو په حال کې وې، د ډیورنډ کرښې هغې غاړې ته بند پاتې شوې دي.
پاکستان د وري پر۶مه له شاوخوا یوې میاشتې وروسته تورخم د کډوالو د بېرته ستنېدو پر مخ بېرته پرانیستی و، خو بیا یې وتاړه.
شاوخوا شپږ میاشتې کېږي چې د افغانستان او پاکستان ترمنځ لارې د نښتو له امله تړل شوې دي. په دې موده کې تورخم او سپین بولدک یوازې د پاکستان څخه د ایستل شویو کډوالو د بېرته ستنېدو لپاره پرانیستي وو، خو له تېرو نږدې څلورو اوونیو راهیسې تورخم د دې بهیر پر مخ هم تړل شوی و.