د طالبانو د بهرنیو چارو وزارت نن شنبه د وري ۸مه، ویلي چې امیر خان متقي د متحده عربي اماراتو د بهرنیو چارو وزیر عبدالله بن زاید ال نهیان سره ټیلیفوني خبرې اترې کړې دي. د یاد وزارت د اعلامیې له مخې، دا خبرې اترې له پاکستان سره د طالبانو د روانو شخړو په اړه متمرکزې وې.
د طالبانو د بهرنیو چارو وزارت پر اېکس خواله رسنۍ کې د یوې اعلامیې په خپرولو سره لیکلي، چې امیر خان متقي د متحده عربي اماراتو د بهرنیو چارو وزیر سره د تیلیفوني خبرو په ترڅ کې د دوه اړخیزو اړیکو، د متحده عربي اماراتو سره د طالبانو د اړیکو او سیمه ییزو پرمختګونو په اړه خبرې وکړې.
د طالبانو د بهرنیو چارو وزارت د اعلامیې له مخې متقي د یو امریکایي بندي د خوشې کولو په برخه کې د متحده عربي اماراتو د منځګړي رول ستاینه وکړه او هیله یې څرګنده کړه چې نورې ستونزې به د دوه اړخیزو اړیکو له لارې حل شي.
هغه دا هم وویل، چې طالبان غواړي له پاکستان سره اختلافات د خبرو اترو له لارې حل کړي او هیڅ لوري ته به اجازه ورنه کړي چې د افغانستان خاوره د پاکستان پر ضد وکاروي.
د هغه په وینا، په دې برخه کې «جدي ګامونه» اخیستل شوي دي.
د طالبانو د بهرنیو چارو وزیر ټینګار کړی، چې د پاکستان پر وړاندې د ډلې پوځي اقدامات «دفاعي» دي او که اسلام اباد خپلو بریدونو ته دوام ورکړي نو له ځواب سره به مخ شي.
د طالبانو په اعلامیه کې د عبدالله بن زاید ال نهیان له قوله هم ویل شوي، چې متحده عربي امارات د طالبانو او پاکستان ترمنځ د تاوتریخوالي زیاتوالی د دواړو خواوو لپاره ګټور نه ګڼي او غواړي چې د خبرو اترو له لارې اختلافات حل کړي.
د اعلامیې له مخې، دواړو خواوو د ایران سره د امریکا او اسراییلو د جګړې په اړه هم خبرې وکړې.
د اماراتو چارواکي وویل، چې د هغه هیواد به په ایران کې د افغان کډوالو امنیت او ساتنې ته پاملرنه وکړي.
په اعلامیه کې دا هم ویل شوي، چې متحده عربي اماراتو د طالبانو او امریکا ترمنځ په اړیکو کې د "مثبت رول" لوبولو لپاره خپل چمتووالی اعلان کړی دی.
