د یونان ساحلي پولیس وایي، چې ۲۲ پناهغوښتونکي په سمندر کې د خپلې کښتۍ دننه له شپږو ورځو لوږې او تندې وروسته مړه شوي دي. اروپايي سرحدي ځواکونه او ساحلي پولیس وتوانېدل، چې له دغې ربړي کښتۍ څخه یوازې ۲۶ نور پناهغوښتونکي وژغوري.
د اروپا د سرحدي ادارې (فرنټکس) په اعلامیه کې راغلي: «په ربړي کښتۍ کې سپرو مساپرو خپل مسیر له لاسه ورکړی و او شپږ ورځې پرته له اوبو او خوړو په سمندر کې سرګردانه وو».
ژغورل شویو پناهغوښتونکو چارواکو ته ویلي، چې د کښتۍ ۲۲ تنه سپرلۍ مړه شوي او مړي یې د یوه قاچاقبر په امر سمندر ته غورځول شوي دي. تر اوسه د قرباني شویو پناهغوښتونکو هویت نه دی مشخص شوی.
دا په داسې حال کې ده، چې یونان له پخوا راهیسې له منځني ختیځ، افریقا او اسیا څخه اروپا ته د پناهغوښتونکو د ننوتلو یوه له اصلي لارو څخه ده. په ۲۰۱۵ او ۲۰۱۶ کلونو کې دا هېواد د اروپا د کډوالۍ کړکېچ په لومړۍ کرښه کې و او نږدې یو میلیون کسان چې ډېری یې له ترکیې څخه خوځېدلي وو، د دې هېواد ټاپوګانو ته ورسېدل.
له دې سره، لا هم ډېری پناهغوښتونکي هڅه کوي چې د مدیترانې سمندر له لارې په کښتیو کې تېر شي، چې په ځینو مواردو کې دا چاره د مرګونو پېښو لامل کېږي. له هغه وخت راهیسې، یونان د پناهغوښتونکو پر وړاندې سختې پالیسۍ غوره کړې دي او د اغزنو تارونو او سمندري ګزمو په جوړولو سره یې خپل سرحدي کنټرول پیاوړی کړی دی.
