«ایاوسي» د ۲۰۲۸کال په المپیک سیالیو کې د ګډون لپاره د پنځو افغان ښځینه لوبغاړو ملاتړ کوي
د المپیک نړۍوالې کمېټې غړې سمیرا اصغري په یوه پروګرام کې اعلان وکړ، چې پنځه افغان ښځینه ورزشکارانې به د «ایاوسي» په ملاتړ د ۲۰۲۸کال د لاس انجلس المپیک سیالیو کې برخه واخلي.
د دغه لوبغاړو له ډلې به درې کسه د بایسکل ځغلونې، یو کس اتلتیک او یو هم د المپیک د سوک وهنې په سیالیو کې ګډون وکړي. هغې زیاته کړه، چې د المپیک نړۍوالې کمېټې تېر کال له افغان لوبغاړو سره پراخه همکاري لرله او په نړۍوالو سیالیو کې یې د دوی د ګډون اسانتیاوې برابرې کړې.
سمیرا اصغري ټینګار وکړ، چې د مالي مرستو او ملاتړ په برخه کې د «ایاوسي» موخه په مهمو نړۍوالو سیالیو کې د افغان لوبغاړو د بریالیتوب لپاره د زمینې برابرول دي، چې تر ټولو مهم هغه یې د ۲۰۲۸کال د لاس انجلس المپیک سیالیو کې د دوی معنا لرونکی او بریالی ګډون دی.
دا په داسې حال کې ده، چې افغان ښځینه ورزشکارانې په وروستیو کلونو کې له ګڼو ننګونو سره مخ دي او د نړۍوالو بنسټونو ملاتړ کولای شي د دوی د فعالیتونو په دوام او په نړۍواله کچه حضور کې کلیدي رول ولوبوي.
