د افغانستان د فوټبال ملي لوبډلې درې مهم او اغېزمن لوبغاړي له لوبډلې بهر شول
د افغانستان د فوټبال ملي لوبډله د سوریې پر وړاندې تر خپلې لوبې دمخه له یوې نوې ننګونې سره مخ ده او هغه ننګونه له ملي لوبډلې څخه د درېیو مهمو او اغېزمنو لوبغاړو وتل دي.
د افغانستان د فوټبال ملي لوبډله د سوریې پر وړاندې تر خپلې لوبې دمخه له یوې نوې ننګونې سره مخ ده او هغه ننګونه له ملي لوبډلې څخه د درېیو مهمو او اغېزمنو لوبغاړو وتل دي.
د فوټبال فدراسیون اعلان کړی، چې امید پوپلزی او مازیار کوهیار به د کورنۍ ستونزو له امله او امید موسوي به د محرومیت له امله په لوبه کې ګډون ونهکړي. دا په داسې حال کې ده، چې ملي لوبډله لا دمخه د لوبغاړو د کمښت له ناورین سره مخ وه.
د میانمار پر وړاندې په وروستۍ لوبه کې هم د ملي لوبډلې یوشمېر لوبغاړو لوبې تحریم کړې او لوبډلې یوازې د شپږو احتیاطي لوبغاړو سره لوبه وکړه. اوس د دغه درېیو اصلي لوبغاړو په نشتوالي سره د تخنیک ډلې لپاره وضعیت نور هم ستونزمن شوی دی.
له بل پلوه فدراسیون اعلان کړی، امید ارزو چې په تېرو لوبو کې غیر حاضر و؛ په جده کې لوبډلې ته اضافه شوی دی. هغه وړاندې د هند په لیګ کې ټپي شوی و؛ خو ارزونې ښیي چې هغه کولای شي لوبه وکړي.
د میانمار تر سفر وروسته افغان لوبډله اوس په جده کې ده او هلته د ۲۰۲۷کال اسیا جام د کوالیفای درېیم پړاو وروستۍ لوبې لپاره چمتووالی نیسي. دغه لوبه به د روانې اونۍ د سېشنبې په ورځ د سعودي په وخت د ماښام په ۷:۱۵ بجو ترسره شي.
په داسې حال کې چې سوریې لادمخه بل پړاو ته لار موندلې، دغه لوبه تشریفاتي بڼه لري.
