په دایکنډي کې د طالبانو تر واک لاندې له پېښو سره د مبارزې او چمتووالي ریاست وایي، په دغه ولایت کې د سختو ورښتونو او سېلابونو له امله خلکو ته ځاني او مالي زیانونه اوښتي دي. د یاد ریاست په وینا؛ په دایکنډي کې د سختو ورښتونو او سېلابونو له امله یو ماشوم مړ او ۲۵ کورونه ویجاړ شوي دي.
د دغه ریاست لهخوا په خپرې شوې خبرپاڼه کې راغلي، دغه زیانونه د دایکنډي مرکز ترڅنګ په ګیتي، خدیر، اشترلي او شهرستان ولسوالیو کې رامنځته شوي دي. د یاد ریاست د لومړنیو شمېرو له مخې؛ په یادو سیمو کې شاوخوا ۲۵ کورونه بشپړ یا برسېرن ویجاړ شوي، نږدې ۵۷ جریبه کرنیزه ځمکه، شاوخوا ۸۰ کیلومتره سړکونه زیانمن شوي او ۷۸۸ ونې لهمنځه تللې دي.
د خبرپاڼې له مخې؛ په دغه ولایت کې یو پنځه کلن ماشوم د یوه کور د چت پرېوتو له امله مړ شوی دی. په سرپل کې هم د طالبانو تر واک لاندې له پېښو سره د مبارزې او چمتووالي ریاست ویلي، چې د وروستیو سېلابونو له امله په دغه ولایت کې یو ماشوم مړ شوی دی.
بل لور ته په فاریاب کې د طالبانو د ټولګټو چارو ریاست خبر ورکړی، چې د دغه ولایت د ګرزیوان، فردوس او بلچراغ ولسوالیو لارې د سېلابونو له امله تړل شوې دي.
