د طالبانو لهخوا د پراخو ګواښونو له امله پاکستان ته کډه شوې افغان ښځینه فعالانې په دغه هېواد کې د ملاتړ غوښتنه کوي. دوی وایي، چې په پاکستان کې د جبري ستنولو له ګواښ سره مخ دي او افغانستان ته د بېرته ستنېدو سره یې ژوند له ګواښ سره مخ کېږي.
د پري په مستعار نوم د طالبانو له زندانه یوې خوشې شوې ښځینه فعالې افغانستان انټرنشنل سره په خبرو کې ویلي، په ډېرې سختۍ وتوانېده چې ځان پاکستان ته ورسوي؛ خو اوس دلته هم د جبري ستنولو له ګواښ سره مخ ده.
هغه وایي:« د طالبانو د زندان کړاو مې لا هېر نه و، چې اوس د کډوالۍ له سخت کړاو سره مخ یم». د هغې په وینا؛ د بېرته ستنېدو سره سم به د طالبانو لهخوا د بیاځل نیول کېدو او د مرګ له ګواښ سره مخ شي.
نوموړې د پاکستان له حکومت نه د هغه افغان فعالانو، خبریالانو او پوځیانو لپاره د ملاتړ غوښتنه کړې، چې د طالبانو لهخوا یې ژوند له ګواښ سره مخ دی. هغه وایي:« هر هغه پناه غوښتونکی چې ژوند یې له ګواښ سره مخ وي، خپل هېواد ته یې بېرته ستنول له نړۍوالو قوانینو سره په ټکر کې چاره ده او باید نړۍواله ټولنه د دغې لړۍ د درولو لپاره لاس په کار شي».
د ثریا په نوم یوه بله فعاله وایي، په ډېرې سختۍ یې ځان ته یو کلنه ویزه اخیستې او له ویزې او قانوني اسنادو سره، سره د پاکستان پولیسو وړمه ورځ نیولې وه او یوه شپه یې په زندان کې ساتلې وه.
هغه وایي:« موږ نه پوهېږو، چې نور څه ډول قانوني اسناد چمتو کړو؛ ځکه اوس دوی ویزه هم نه مني. د ویزې له مخې خو موږ په دغه هېواد کې د پاتې کېدو لپاره قانوني حق لرو؛ خو بیا هم نیول کېږو، ځورول کېږو او رټل کېږو».
دا په داسې حال کې ده، چې واک ته د طالبانو له رسېدو راهیسې ګڼ افغان فعالان، خبریالان او پوځیان چې د یادې ډلې لهخوا له ګواښ سره مخ وو؛ پاکستان ته کډه شول خو د ویزو د تمدید لړۍ درېدو سره دوی له پراخو ننګونو سره مخ دي.
د راپورونو له مخې؛ ګڼ دغه فعالان، خبریالان او پوځیان د جبري اېستلو وروسته په افغانستان کې لادرکه شوي دي.
له بل پلوه د طالبانو د کډوالو او بېرته راستنېدونکو چارو وزارت وايي، په تېر ۱۴۰۴کال کې ۳ مېلیونه، ۱۱۴ زره او ۱۰۷ کسان له ایران، پاکستان او ترکیې نه په جبري توګه او خپله خوښه بېرته افغانستان ته ستانه شوي دي.
