د طالبانو د امر بالمعروف وزارت د شنبې په ورځ (د وري ۸مه) خبر ورکړی، چې د دغه وزارت محتسبانو په پنجشېر، کاپیسا، بلخ، بامیان، دایکنډي، فاریاب او کابل ولایتونو کې یوشمېر هټۍ او مارکېټونه د څارنې پرمهال تړلي دي.
د یاد وزارت لهخوا په خپرې شوې خبرپاڼه کې راغلي، چې د دوی محتسبانو د یادې څارنې پرمهال «له اسلامي قوانینو د سرغړونې» له امله ګڼې هټۍ او سوداګریز مارکېټونه تړلي دي. د یاد وزارت په خبرپاڼه کې راغلي، چې د دغه هټیو او سوداګریزو مارکېټونو څښتنان د طالبانو قضايي ادارو ته ورپېژندل شوي دي.
د طالبانو د امر بالمعروف وزارت تر دې وړاندې هم د لوړو بیو له امله ګڼې هټۍ تړلې وې. د ډیورنډ کرښې د لارو د تړل کېدو له امله په افغانستان کې د خوراکي توکو بیې وار له مخه لوړې شوې وې؛ خو پر ایران د امریکا او اسراییل له برید وروسته دغه بیې په بېسارې توګه لوړې شوې دي.
اوس نیوکې کېږي، چې طالبان د خوراکي او نورو لومړنیو توکو د بیو په کنټرول کې پاتې راغلي او لویو سوداګرو احتکار ته مخه کړې ده.
