اروپایي هېوادونه: روسیه په مستقیم او څرګند ډول د ایران له نظامي بریدونو سره مرسته کوي
څو باوري سرچینو سيبياېس نیوز خبري شبکې ته ویلي، د واشنګټن متحدو اروپايي هېوادونو په ښکاره او پټه امریکايي ډیپلوماټانو ته ویلي، چې روسیه په مستقیم او څرګند ډول د ایران له نظامي بریدونو سره مرسته کوي او دا مرسته تر هغه څه ډېره ده چې امریکا یې په علني ډول بیانوي.
د دغه راپور لهمخې، اروپايي هېوادونه لا هم استدلال کوي چې د مسکو او تهران ترمنځ د همکاریو له امله د اوکراین جګړه د ایران پر ضد له جګړې سره تړل شوې ده.
یوه برېتانوي چارواکي سيبياېس نیوز ته ویلي، چې په وروستیو کلونو کې د روسیې او ایران ترمنځ دفاعي همکارۍ په بېساري ډول زیاتې شوې دي او د ایران ټکنالوژیکي پرمختګونه اوس په منځني ختیځ کې په ترسره کېدونکو بریدونو کې ښکاره معلومېږي.
برېتانیا پر دې باور ده، چې ایران نه یوازې مسکو ته شاهد ډرون الوتکې ورکړې دي څو د اوکراین د جګړې په ډګر کې ترې ګټه پورته کړي، بلکې د تولید تخنیکي پوهه یې هم روسیې ته لېږدولې چې دې چارې له ایران سره مرسته کړې څو د ډرون جګړې په برخه کې خپله وړتیا نوره هم پیاوړې کړي.
دغه برېتانوي چارواکي ونهشوای کړای چې له روسیې څخه ایران ته د تجهیزاتو وروستی لېږد تایید کړي.
د یوه جګپوړي امریکايي چارواکي په ګډون څو سرچینو چې مستقیم معلومات یې لرل، د ایران پر ضد د جګړې په پیل کې سيبياېس نیوز ته ویلي وو، چې روسیه په منځني ختیځ کې د امریکايي سنګرونو او موقعیتونو په اړه تهران ته استخباراتي معلومات ورکوي.
د اروپايي ټولنې د بهرني سیاست مسوولې د پنجشنبې په ورځ وویل، روسیه تهران ته استخباراتي ملاتړ چمتو کوي ترڅو «امریکایان ووژني».
