د طالبانو سترې محکمې خبر ورکړی، چې په کابل کې یې ۱۵ کسان د نشهیي توکو (شیشې، چرسو او ټابلېټ کا) د پلور او قاچاق په تور په عام محضر کې په دُرو وهلي دي. د یادې محکمې په وینا؛ دغه کسانو ته له اوو میاشتو تر درېیو کلونو د تنفیذي بند او له ۱۰ تر ۳۰ دُرو سزا ورکړل شوې ده.
دا په داسې حال کې ده، چې طالبان نږدې هره ورځ د افغانستان په بېلابېلو ولایتونو کې د ښځو په ګډون لسګونه کسان په عام محضر کې په دُرو وهي.
طالبانو یوازې په تېره یوه اوونۍ کې په بېلابېلو ولایتونو کې د ښځو په ګډون ۶۰ کسان په دُرو وهلي دي. د طالبانو سترې محکمې د جلا-جلا خبرپاڼو په خپرولو سره ویلي، چې دغه کسان یې په غور، نیمروز، بلخ، ننګرهار، پکتیکا، سمنګان، فاریاب، دایکنډي، جوزجان، هرات او کابل ولایتونو کې په دُرو وهلي دي.
د یادونې وړ ده، چې طالبان ډېری نارینه د «غلا، د نشهیي توکو د پلور او کارولو، لواطت او قمار» په تور په دُرو وهي؛ خو ښځې، نجونې او «LGBT+» بیا د «زنا، نامشروع اړیکو او له کوره د تېښتې» په تور په نښه کېږي او په دُرو وهل کېږي.
