د غزې روغتيايي چارواکو د دوشنبې په ورځ اعلان وکړ چې یوه ښوونځي ته څېرمه د اسراییل په هوايي بريد کې ۱۰کسان وژل شوي دي. چارواکي وایي، دغه برید هغه ځای ته هم نږدې شوی چې بېځایه شوي فلسطینیان پهکې مېشت وو.
د غزې د روغتیا وزارت وايي چې د تېر کال د اکټوبر میاشتې له اوربند راهیسې، لږ تر لږه ۷۰۰ فلسطینیان د اسراییل په بریدونو کې وژل شوي دي.
ډاکترانو او د غزې اوسېدونکو د دوشنبې د ورځې د پېښې په اړه رویټرز ته ویلي چې ځینې فلسطینیان له هغې وسلهوالې ډلې سره په نښته کې ښکېل شوي وو چې د اسراییل ملاتړ ورسره دی، ځکه دې ډلې هڅه کوله پر ښوونځي برید وکړي او یو شمېر کسان یرغمل کړي.
سرچینو رویټرز ته ویلي چې دا نښته د غزې د مرکزي سیمې په المغازي د کډوالو کمپ ختیځ لور ته شوې ده. د نښتې پر مهال د اسراییل بېپیلوټه الوتکو پر دغه سیمه دوه توغندي وویشتل، چې له امله یې ۱۰ تنه وژل شوي او یو شمېر نور ټپیان دي.
خو د دې ډلې له مشرانو څخه یو تن په یوه ویډیويي پیغام کې ادعا کړې چې دوی د حماس شاوخوا پنځه غړي وژلي دي.
همدارنګه، د دوشنبې په سهار وختي د اسراییل په یوه بل هوايي برید کې یو فلسطینی چې پر موټرسایکل سپور و، وژل شوی او یو ماشوم ټپي شوی دی. سربېره پر دې، د غزې ډاکتران وايي چې اسراییلي ځواکونو د غزې په مرکزي سیمه کې پر یوه موټر ډزې کړې، چې له امله یې یو بل فلسطینی هم وژل شوی دی، او په دې توګه د دوشنبې د ورځې د وژل شویو شمېر ۱۲ تنو ته رسېدلی دی.
د اسراییل پوځ تر اوسه د دوشنبې د ورځې د دغو درېیو پېښو په اړه څه نه دي ویلي. د غزې د روغتیا وزارت د شمېرو له مخې، په ۲۰۲۳ کال کې پر غزه د اسراییل د بریدونو له پیل راهیسې تر اوسه پورې له ۷۲ زرو څخه زیات فلسطینیان وژل شوي دي.
