په خوست کې د ناچاودې سرګلولې په چاودنه کې یو ماشوم وژل شوی او درې ټپیان دي
د طالبانو د خوست امنیې قومندانۍ ویلي، چې له تېرو جګړو پاتې ناچاودېدلي سرګلولې د چاودنې له امله یو ماشوم وژل شوی او درې نور ماشومان ټپیان شوي دي.
د طالبانو د خوست امنیې قومندانۍ ویلي، چې له تېرو جګړو پاتې ناچاودېدلي سرګلولې د چاودنې له امله یو ماشوم وژل شوی او درې نور ماشومان ټپیان شوي دي.
په خپره شوې خبرپاڼه کې راغلي چې پېښه نن (دوشنبه، د وري۱۷مه) شاوخوا لس بجې مخکې له غرمې د خوست ښار د «مرديخېل» په سیمه کې رامنځته شوې ده.
دوی زیاته کړې چې ټپیان شوي درې ماشومان نجونې دي او سمدستي روغتون ته لېږدول شوي، خو د هغوی د روغتیايي وضعیت په اړه نور جزییات نه دي ورکړل شوي.
چارواکي وایي، په افغانستان کې د څو لسیزو جګړو له امله لا هم د هېواد ګڼې سیمې د ماینونو او ناچاودېدلو مهماتو له ګواښ سره مخ دي.
د ملګرو ملتونو د شمېرو له مخې، شاوخوا درې اعشاریه درې میلیونه کسان په افغانستان کې د هغو سیمو په یو کیلومترۍ کې ژوند کوي چې له ماینونو او چاودېدونکو توکو ککړې دي.
د جګړې پاتې مهماتو چاودنو په وار وار د خلکو، په ځانګړي ډول د ماشومانو، ژوند اخیستی او لا هم د جدي اندېښنې وړ ستونزه ګڼل کېږي.
