شي جين پينګ په چین کې د انرژۍ د نوي سیستم د چټک پرمختګ غوښتنه کړې
د چین ولسمشر شي جين پينګ د خپل هېواد د انرژۍ امنیت د خوندي کولو لپاره د انرژۍ د نوي سیستم د چټک پلان او جوړولو غوښتنه کړې ده. نوموړي دغه راز د اټومي انرژۍ د خوندي او منظمې پراخېدا یادونه هم کړې ده.
د چین دولتي رسنیو د راپور له مخې، شي جين پينګ د اوبو برېښنا پر پراختیا او د چاپېریال ساتنې پر ارزښت ټینګار کړی او همدارنګه یې د اټومي انرژۍ د خوندي او منظمې پراخېدا غوښتنه کړې ده.
هغه ویلي چې چین د انرژۍ په برخه کې نړیوالو بدلونونو ته په کتو مهمې پرېکړې کړې او د انرژۍ د امنیت نوې ستراتیژي یې پیاوړې کړې ده.
کارپوهان وايي چین د انرژۍ د بیو له لوړوالي سره د مقابلې ښه توان لري، ځکه د دغه هېواد د انرژۍ ډېره برخه لا هم د سکرو له لارې تامینېږي او د تیلو واردات یې د هرمز له تنګي یوازې یوه کوچنۍ برخه جوړوي.
شي جين پينګ ټینګار کړی چې که څه هم سکاره د انرژۍ د سیستم بنسټ جوړوي، خو چین باید د پاکې او ټیټ کاربنه انرژۍ پراختیا ته ژمن پاتې شي.
