محمدعلي عظيمي د هالنډ په «بینفلکس» سیالیو کې لومړی مقام ترلاسه کړ
اتریش مېشتی افغان بدنساز محمد علي عظیمي د هالنډ په «بینفلکس» سیالیو کې لومړی مقام خپل کړ او د نړۍ د تر ټولو معتبرې مسلکي بدنسازۍ سیالۍ، «مسټر اولمپیا»کې یې د ګډون جواز ترلاسه کړ.
عظيمي د دوشنبې، د وري۱۷مه، په «کلاسیک فزیک» برخه کې د بې ساري فعالیت په وړاندې کولو سره د قهرمانۍ لوړ مقام ته ورسېد.
په دې سیالیو کې د هسپانیا ورزشکار فران مینا ابانیز دوهم او د هالنډ ورزشکار سییم ګوسنس درېیم مقام ترلاسه کړ.
دا بریا محمدعلي عظيمي د دویم افغان ورزشکار په توګه معرفي کوي چې د «مسټر المپیا» سیالیو لپاره سهمیه ترلاسه کوي، چې دا سیالۍ د نړۍ په کچه د مسلکي بدنسازۍ تر ټولو لوړ معیار ګڼل کېږي.
رپوټونه وايي چې عظيمي د کلونو لپاره دعلي بلال تر لارښوونې لاندې تمرین کړی دی. علی بلال د افغانستان د بدنسازۍ پېژندل شوی څېره ده، چې مخکې یې د «ارنولد کلاسیک» قهرماني او دوه ځله د «مستر المپیا» دوهم مقام ترلاسه کړی دی.
