د امریکا ولسمشر ډونالډ ټرمپ ویلي چې ایران ته یې د هوکړې لپاره ټاکلی ضربالاجل وروستی دی او نور به ونه غځول شي. ټرمپ د دوشنبې په ورځ وویل چې ایران یو وړاندیز وړاندې کړی، چې مهم ګام بلل کېږي، خو د ده په وینا، لا هم بسنه نه کوي.
هغه خبرداری ورکړی چې که تر سې شنبې شپې پورې هوکړه ونه شي، امریکايي ځواکونه به د ایران پر زیربناوو پراخ بریدونه وکړي.
ایران د ټرمپ ټاکل شوی ضربالاجل رد کړی او ټینګار یې کړی چې د جګړې د پای لپاره باید دایمي حل پیدا شي.
د راپورونو له مخې، د امریکا لوړپوړي چارواکي د پاکستان له لارې له ایران سره غیر مستقیمې خبرې پر مخ وړي، چې موخه یې له اټومي وسلو څخه د ایران تېرېدل او د هرمز تنګي بیا پرانېستل دي. ایران خپل ځواب اسلام اباد ته سپارلی دی.
ټرمپ وویل چې که تهران یې شرطونه ومني، جګړه ژر پای ته رسېدلی شي.
نوموړي دا هم وویل چې د ایران نوی مرکچي پلاوی د پخوانیو په پرتله لږ سخت دریځه ښکاري.
هغه زیاته کړه چې که واک یې وای، امریکا به د ایران د تېلو کنټرول هم په لاس کې اخیستی وای، خو دا یې ومنله چې ښایي امریکايان دا پرېکړه ونه مني.
