پاکستانۍ اېکسپرېس ټرېبیون ورځپاڼې ویلي، چې پاکستان د چین په ارومچي کې د روانو خبرو په لړ کې افغان طالبانو ته خپلې درې بنسټیزې غوښتنې وړاندې کړې دي. راپور کې راغلي، یوه غوښتنه دا شوې چې پر کابل واکمن باید د پاکستاني طالبانو غورځنګ د ترهګرې ډلې په توګه وپېژني.
د ارومچي مذاکرات د چین په منځګړیتوب ترسره کېږي او موخه یې د دواړو خواوو ترمنځ د اختلافاتو د حل لپاره د پنځه مادهییز چوکاټ رامنځته کول بلل شوي دي.
د اېکسپرېس ټرېبیون ورځپاڼې د راپور له مخې، اسلاماباد د خبرو په پیل کې ټینګار کړی چې کابل باید د تحریک طالبان پاکستان (ټي ټي پي) ډله په رسمي ډول د یو ترهګریز سازمان په توګه اعلان کړي، د دې ډلې بنسټونه له منځه یوسي او د دغو اقداماتو د ثبوت لپاره د باور وړ شواهد وړاندې کړي.
دغه درې غوښتنې د پاکستان د مذاکراتي دریځ بنسټ جوړوي؛ هغه دریځ چې د سرچینو په وینا، د پرلهپسې امنیتي اندېښنو له امله لا سخت شوی دی.
د پاکستان د بهرنیو چارو وزارت تر دې دمه یوازې د یوې لومړنۍ اعلامیې په خپرولو سره په ارومچي کې د دغو خبرو اترو ترسره کېدل تایید کړي، خو د اجنډا یا د خبرو د پرمختګ په اړه یې نور جزییات نه دي شریک کړي.
په همدې حال کې، د پاکستان د بهرنیو چارو وزارت ویاند طاهر اندرابي په خپله اوونیزه ناسته کې ویلي چې په دې خبرو کې د پاکستان ګډون باید د دې هېواد د پالیسۍ د بدلون په توګه تعبیر نه شي، په ځانګړي ډول د روانو امنیتي عملیاتو په تړاو چې د وسلهوالو ډلو خلاف روان دي.
د طالبانو او پاکستان ترمنځ له تېرو څو میاشتو راهیسې سخت امنیتي او سیاسي کړکېچ روان دی او په همدې ترڅ کې دواړو لوریو له یو بل سره سوداګریزې اړیکې هم بندې کړې دي. تر چین مخکې، قطر، سعودي عربستان او ترکیې هم د طالبانو او اسلاماباد منځګړیتوب کړی و، خو کومه پایله یې نه وه ورکړې.
