واوره او توپان؛ طالبانو د سالنګونو لویه لاره د لنډمهال لپاره وتړله
د طالبانو د ټولګټو وزارت خبر ورکړی، چې د سالنګونو لویه لاره د درنې واورې، باران او توپان له امله د ټرافیکو پر مخ وتړل شوه. طالبانو ویلي، دا پرېکړه د لید ساحې د محدودیت له امله د انساني او مالي زیانونو د مخنیوي په موخه شوې ده.
طالبانو ویلي چې د دوشنبې د ماښام له ۷نیمو بجو وروسته پر دغه لاره د موټرو هر ډول تګ راتګ بند دی او خلک باید د سفرونو لپاره تر بلې خبرتیا پورې انتظار وباسي. خبرپاڼه کې زیاته شوې چې د هوا د ښه کېدو او توپان له کمېدو سر سم به سالنګ کې د طالبانو د ساتنې ټیمونه د واورینو سیمو د پاکوالي چارې پیل کړي، څو لاره د ټرافیکو پرمخ بیا ژر خلاصه شي.
دا لومړی ځل نه دی چې د واورو او توپان په بهیر کې دغه لاره تړل کېږي، بلکې دې وړاندې هم په ځلونو دا لاره تړل شوې ده.
