د جاپان لومړۍ وزیره: هرمز تنګي کې د بېړیو د خوندیتوب او د تاوتریخوالي کمولو لپاره هڅې کوو
د جاپان لومړۍ وزیره سانای تاکایچي د سېشنبې په ورځ ویلي، چې په منځني ختیځ کې د «تاوتریخوالي د کمولو» لپاره به خپلې ټولې هڅې وکړي او د ایران له «مشرانو» سره د خبرو اترو لپاره یې خپل چمتووالی څرګند کړی دی.
نوموړې ویلي، چې چمتو ده له ډونالډ ټرمپ او مسعود پزشکیان سره ټلیفوني خبرې وکړي.
بلخوا، تاکایچي د دوشنبې په ورځ ویلي وو چې توکیو له ایران سره پر دولتي مسایلو خبرې اترې ترسره کړې دي او که څه هم د مشرانو د لیدنې موضوع تر بحث لاندې ده، خو دوی یې د چمتووالي په حال کې دي.
تاکایچي زیاته کړې، چې د دغو خبرو اصلي موخه «په هرمز تنګي کې د بېړیو د تګراتګ خوندیتوب» تامینول دي.
