د روغتیا نړیوالې ورځې په مناسبت، د ملګرو ملتونو د نشهيي توکو او جرمونو پر وړاندې د مبارزې دفتر په خپره شوې اعلامیه کې ټینګار شوی، چې په افغانستان کې د نشهيي توکو کړکېچ یوازې یوه جلا او محدوده ستونزه نه ده، بلکې د عامې روغتیا په برخه کې یوه جدي ننګونه بلل کېږي.
په اعلامیه کې ویل شوي، چې د دې کړکېچ اغېزمن مهارول هغه مهال ممکن دي چې پراخې، دوامداره او پر کره شواهدو ولاړې حللارې غوره شي؛ داسې حللارې چې په کې انسانان لومړیتوب ولري. یادې ادارې همدارنګه پر دې ټینګار کړی چې باید یوه هر اړخیزه تګلاره خپله شي، څو د دې ستونزې بېلابېل اړخونه، له عامې روغتیا نیولې تر ټولنیز او اقتصادي پرمختګ پورې باید په یو وخت کې تر پاملرنې لاندې ونیول شي.
دغه نړیوال بنسټ د لا پراخې همکارۍ او اوږدمهاله ژمنتیا غوښتنه کړې، څو په افغانستان کې د نشهيي توکو د کړکېچ ریښو ته رسېدنه وشي. همدارنګه یې څرګنده کړې چې یوازې د همدې ډول پراخ او منظم چلند له لارې کېدای شي دوامداره او اغېزمنې پایلې تر لاسه شي.
