د ملګرو ملتونو امنیت شورا د هرمز تنګي په اړه د پرېکړهلیک مسوده جوړوي
د امنیت شورا د راپور لهمخې، ټاکل شوې ده چې د ملګرو ملتونو امنیت شورا نن سېشنبه (د وري ۱۸مه) د یوه پرېکړهلیک پر مسودې رایه اچونه وکړي، چې موخه یې د هرمز تنګي کې د بېړیو د تګراتګ خوندیتوب او د سیمهییز تاوتریخوالي کمول دي.
مسوده له هغو هېوادونو غوښتنه کوي چې د تنګي په سوداګریزو لارو کې فعالیت لري، څو د سوداګریزو بېړیو د ساتنې لپاره ګډې دفاعي هڅې وکړي او له ایران څخه غواړي، چې د بېړیو پر ضد بریدونه او د تنګي د تګراتګ د بندولو هڅې سمدستي ودروي.
همدارنګه دغه شورا غواړي، چې د غېرنظامي زېربناوو لکه د اوبو، انرژۍ او نفتو د زېربناوو پر ضد بریدونه هم بند شي.
دغه مسوده بحرین د فارس خلیج همکاریو د شورا او اردن په همغږۍ وړاندې کړې ده.
په وروستیو اوونیو کې پر ایران د امریکا او اسراییل د بریدونو له امله په هرمز تنګي کې تاوتریخوالی زیات شوی. ایران په ځوابي توګه هڅه کړې، چې د بېړیو تګراتګ ګډوډ کړي. بلخوا، امریکا او اسراییل هم ځینې سمندري تاسیسات هدف ګرځولي دي.
راپور زیاتوي، چې د امنیت شورا د غړو ترمنځ د مسودې په اړه ځینې اختلافونه هم رامنځته شوي. په لومړنیو مسودو کې د زور د کارولو اجازه هم شوې وه، خو چین او روسیې مخالفت کړی او خبرداری یې ورکړی چې دا به تاوتریخوالی لا زیات کړي.
پایلې ته له رسېدو وروسته، په وروستۍ مسوده کې د «دفاعي اقداماتو» او نړۍوالې همکارۍ ټینګار شوی او د تحریمونو بحث عمومي شوی دی.
ځینې هېوادونه لکه فرانسه او برېتانیا هڅې کوي، چې د بېړیو د خوندي تګ لپاره نړۍوال اېتلاف جوړ کړي، خو د لاسوهنې په څرنګوالی کې اختلاف لري او ځینو هېوادونو مستقیم نظامي ګډون نهدی ښودلی.
ورته مهال، د هرمز تنګي ناامنۍ نړۍواله سوداګري او د انرژۍ بازار ته جدي ګواښ رامنځته کړی دی.
