ایران د ټرمپ د «دوزخ» ګواښ پر وړاندې سرغړوونکی دریځ نیولی
ایران داسې هېڅ نښه نه ده ښودلې چې د امریکا د ولسمشر ډونالډ ټرمپ ګواښ ته پکې نرمښت وبرېښي. ټرمپ ویلي چې ایران باید تر سېشنبې هرمز تنګی بېرته پرانیزي او که نه نو له پراخو بریدونو سره به مخ شي او دوزخ به یې وګرځوي.
ټرمپ ایران ته تر ماښام ۸ بجو مهلت ورکړی و، چې په هرمز تنګي کې پر تېل وړونکو بیړیو بندیز پای ته ورسوي.
رویټرز وايي، ایران دا غوښتنې رد کړې او ګواښ یې کړی چې په خلیج کې به د امریکا د متحدینو پر بنسټیزو تاسیساتو بریدونه وکړي.
اسراییل هم د سېشنبې په ورځ د ایران ملکي بنسټونو ته خبرداری ورکړی او خلکو ته یې ویلي چې د اورګاډي پټلۍ او رېللارو ته نږدې مه ځئ، ځکه دا به ستاسې ژوند له خطر سره مخ کړي.
