امریکا د جنګي جرمونو له تورونو د تېښتې لپاره د ایران د اهدافو نوملړ کې بدلون راوستی
پولیټیکو خبر ورکړی چې پنټاګون په ایران کې د خپلو پوځي اهدافو نوملړ ته د داسې ګډو تاسیساتو په ورزیاتولو کار پیل کړی، چې ملکي او پوځي دواړو برخو ته انرژي رسوي. د راپور لهمخې، امریکا غواړي پر بنسټیزو زېربناوو د احتمالي برید په صورت کې ځان د جنګي جرمونو له تورونو وژغوري.
دغې امریکایي رسنۍ د سېشنبې په سهار (د وري ۱۸مه) په ایران کې د پلونو او برښناکوټونو د ویشتلو لپاره د ډونالډ ټرمپ د ټاکلي وخت پای ته له ۲۴ ساعتونو په کمه موده کې د دوو دفاعي چارواکو له قوله لیکلي، چې په دغه نوملړ کې د شاملو اهدافو «دوه ګونی ماهیت» کولی شي هغوی په مشروع اهدافو بدل کړي.
یوې بلې سرچینې هم یادې رسنۍ ته ویلي، چې د پنټاګون د چارواکو ترمنځ د «پوځي او ملکي اهدافو ترمنځ د پولې ټاکلو» په اړه د نظر اختلاف شتون لري او «د دې توجیه معتبرتوب» د هغوی ترمنځ د بحث موضوع ده. دغې سرچینې د موضوع د روښانولو لپاره د کُن خوږو اوبو تاسیساتو ته اشاره کړې، چې ښايي د هدف په توګه وبلل شي، ځکه پوځي ځواکونه هم د څښاک اوبو ته اړتیا لري.
پولیټیکو لیکلي، چې پنټاګون د دې رسنۍ پوښتنو ته ځواب ویل سپینې ماڼۍ ته راجع کړي او د سپینې ماڼۍ ویاندې کارولین لیویټ د پنټاګون دنده «د وسلهوالو ځواکونو اعلی سرقوماندان ته د ډېرو انتخابونو چمتو کولو لپاره د لازم چمتووالي نیول» وبلل.
هغې همداراز دغې رسنۍ ته وویل: «دا په دې معنا نه ده چې ولسمشر کومه پرېکړه کړې ده. د ایران حکومت د سېشنبې تر شپې ۸ بجو [د امریکا د ختیځ په وخت] فرصت لري چې له متحده ایالاتو سره هوکړې ته ورسېږي. که دا کار ونهکړي، ولسمشر به لکه څنګه چې ژمنه یې کړې، هغوی به بېرته د حجر دورې ته بوځي».
