په چمن کې پرلت کوونکي: د لارې د بندېدو له امله ۱۰۰ زره کورنۍ اغېزمنې شوې دي
د چمن ځايي اوسېدونکو افغانستان انټرنشنل-پښتو ته ویلي، د چمن-سپین بولدک لاره له څو میاشتو راهیسې د عامه تګراتګ او سوداګرۍ پر مخ تړلې ده او یوازې افغان کډوال له دې لارې هېواد ته ستنېږي. د دې ستونزې له امله د تېرې میاشتې له ۲۸مې راهیسې د چمن اوسېدونکو او سوداګرو پرلت کړی دی.
د چمن د پرلت ویاند صادق اڅکزی وايي، چې د دغې لارې د بندېدو له امله شاوخوا ۱۰۰ زره کورنیو خپل کار او عاید له لاسه ورکړی دی.
بلخوا، د چمن د ولسوالۍ د مرستیال دفتر په یوې خپره کړې خبرپاڼه کې ویلي، د هغو کسانو لپاره یو ځانګړی پروګرام پیلوي چې د لارې د بندېدو له امله بېکاره شوي دي.
د معلوماتو لهمخې، په لومړي پړاو کې به له ۲۰ تر ۳۰ کسانو سره مالي او تخنیکي مرستې وشي، څو د کار زمینه ورته برابره شي او همدارنګه په راتلونکو پړاوونو کې به نورو مسلکي کسانو ته هم د کاري فرصتونه برابر شي.
