له اوربند وروسته ایران پر څلورو عربي هېوادونو بریدونه کړي
د امریکا او ایران ترمنځ د دوه اونیز اوربند له اعلان وروسته، سعودي عربستان، عربي متحده اماراتو، کویټ او بحرین ویلي، چې ایران پرې توغندیز او ډرون بریدونه کړي دي. په دغو بریدونو کې ځینو تاسیساتو ته زیان اوښتی او یو شمېر کسان ټپیان شوي دي.
د عربي متحده اماراتو د دفاع وزارت ویلي، چې د دغه هېواد هوايي دفاعي سیستمونو د ایران توغول شوي توغندي او ډرون الوتکې په نښه کړې دي. خو د حبشان ګازو په کمپلکس کې د توغندي د پاتې شونو د لوېدو له امله اورلګېدلی او فعالیتونه یې درېدلي دي.
عربي متحده اماراتو په دغو بریدونو کې د دوو اماراتي او یوه هندي وګړي د ټپي کېدو خبر ورکړی دی.
همدارنګه کویټ هم منلې، چې د ایران اسلامی جمهوریت ۲۸ ډرون الوتکې یې په نښه کړې دي.
د کویټ پوځ ویلي، چې ځینو ډرون الوتکو د دغه هېواد، تېلو، برېښنا او د اوبو د تصفیې مرکزونه په نښه کړي او جدي زیانونه یې ور اړولي دي.
د امریکا او ایران ترمنځ له اوربند وروسته، بحرین هم د ایران په ورته بریدونو کې د دوه وګړو د ټپي کېدو او یو شمېر کورونو د زیانمن کېدو راپور ورکړی دی.
په ورته مهال سعودي عربستان هم ویلي، چې په تېرو څو ساعتونو کې یې د ایران ۹ ډرون الوتکي له منځه وړې دي.
