د پاکستان حکومت د پاکستان د تابعیت په قانون کې بدلون راوستی

په دغه قانون کې تر بدلون وروسته اوس د پلار ترڅنګ د مور کلېمه هم کارول شوې، چې دې سره هغه کسان چې پلار یې د پاکستان تابعیت نه‌لري او مور یې د دغه هېواد تابعیت لري؛ کولای شي د پاکستان تابعیت ترلاسه کړي. د یاد قانونو له مخې؛ د دغه کسانو لپاره د تابعیت ورکولو پرمهال د زېږېدنې ځای هم په پام کې نه نیول کېږي.
د یاد قانون پلي کېدو سره به په پاکستان کې مېشتو هغو افغانانو ته هم د پاسپورټ او پاکستانۍ پېژندپاڼو د ورکړې پر وړاندې شته خنډونه لرې شي، چې مېندو یې له افغانانو سره ودونه کړي دي.
تر دې وړاندې داسې کورنیو به د‌ محکمو له لارې پېژندپاڼې او پاسپورټ ترلاسه کاوه؛ خو اوس د خیبر پښتونخوا او سند ايالت محکمو د پرېکړو له مخې د تابعیت په قانون کې بدلون راغلی دی.