ځايي طالب چارواکي وايي، چې له تېرې شپې راهیسې په کونړ او لغمان کې د سختو بارانونو او ورښتونو له کبله ۵ تنه مړه او ۱۳ نور ټپیان شوي دي. په دواړو ولایتونو کې نږدې ۶۰۰ کورونه زیانمن شوي او تر ۱۰۰۰ جریبه زیاته ځمکه تخریب شوې ده.
په کونړ کې د طالبانو تر واک لاندې له پېښو سره د مبارزې ادارې مشر محمدمبین مفتون عمر ویلي، د یاد ولایت مرکز اسعداباد په ګډون په ټولو ولسوالیو کې تېره شپه د سخت باران او ورښتونو له کبله ۳ تنه مړه او ۷ نور ټپیان شوي دي. نوموړي ویلي، چې په دغه ولایت کې ۴۸۰ کورونه په بشپړ او نسبي ډول زیانمن شوي دي.
مفتون عمر زیاتوي، چې د ۱۹ پلچکونو ترڅنګ ۵۰۰ جریبه کرنیزه ځمکه هم زیانمنه شوې او څاروي هم تلف شوي دي. د طالبانو ځايي چارواکي وايي، چې په لغمان کې د تېرې شپې سېلابونو دوه کسه مړه کړي او ۶ نور یې ټپیان کړي دي. سېلابونو په یاد ولایت کې ۱۱۰ کورونه زیانمن کړي، ۴۰۰ جریبه ځمکه یې تخریب کړې او ۲۸ څاروي یې لهمنځه وړي دي.
