د پاکستان پولیسو د عمران خان درې خویندې نیولې دي
د پاکستان د تحریک انصاف ګوند غړو له زندانه د یاد ګوند د بنسټګر او د پاکستان پخواني لومړي وزیر عمران خان د خلاصون په موخه د اډیاله زندان مخته احتجاج وکړ؛ خو دغه احتجاح هغه مهال پای ته ورسېد، چې پولیسو د یاد ګوند د ځینو مشرانو او نورو غړو په ګډون د عمران خان درې خویندې ونیولې.
د پاکستان تحریک انصاف ګوند له وړاندې د دغه احتجاح اعلان کړی و؛ خو د پاکستان حکومت پر احتجاجونو بندیز او د یاد هېواد د قانون ۱۴۴مې مادې د تطبیق اعلان وکړ. له بل پلوه د تحریک انصاف ګوند د پاکستان حکومت لهخوا د یاد ګوند د مشرانو او غړو پر ضد عملیات غندلي او ويلي یې دي، چې د دوی پر ضد له زوره کار اخیستل شوی دی.
د پاکستان تحریک انصاف ګوند بنسټګر او د پخواني لومړي وزیر عمران خان خور علیمه خان تر دې وړاندې له زندانه د نوموړي او د هغه د مېرمنې بشرا بيبي د خلاصون لپاره د یاد ګوند پر غړو او پلویانو غږ کړی و، چې د احتجاج لپاره سړکونو ته راووځي.
عليمه خان د تېرې سېشنبې په ورځ له رسنیو سره په خبرو کې ویلي و، عمران خان له روغتیايي ستونزو سره مخ دی چې دې مسلې دوی سخت اندېښمن کړي دي. نوموړې ټينګار کړی و، چې د عمران خان درملنه دې په شفا نړۍوال روغتون کې ترسره شي.
