په کاپیسا کې د طالبانو تر کنټرول لاندې له پېښو سره د مبارزې او چمتووالي ریاست خبر ورکړی، چې په دغه ولایت کې د سختو ورښتونو او سېلابونو له کبله ۱۴۷ استوګنیز کورونه نړېدلي دي، ۱۰ کیلومتره سړک زیانمن شوی او ۷۲۵ جریبه کرنیزه ځمکه تخریب شوې ده.
د یاد ریاست په وینا؛ د دغه ورښتونو او سېلابونو له امله د څښاک اوبو ۵ څاګانې، د اوبو رسولو ۱۲ شبکې، ۶ پلچکونه، ۱۵ څاروي او ګڼ شمېر مېوه لرونکي او غیر مېوه لرونکي نیالګي هم زیانمن شوي دي.
د دغه ریاست د معلوماتو له مخې؛ لا هم په دغه ولایت کې بارانونه دوام لري او د زیانونو د زیاتېدو احتمال شته.
د طالبانو په ولکه کې د پېښو پر وړاندې د چمتوالي ملي ادارې تېره ورځ اعلان کړی، چې د تېرو ۲۴ ساعتونو په ترڅ کې په هېواد کې د سختو بارانونو او زورورو سېلابونو له امله لږ تر لږه ۲۲ کسان مړه او ۳۲ نور ټپیان شوي دي.
د یادې ادارې ویاند محمد یوسف حماد ویلي، چې د دغه پېښو له امله شاوخوا ۲۵۰ کورونه په بشپړ یا جزوي ډول ویجاړ شوي دي.
