د لبنان د روغتیا وزارت ویاند رویټرز ته ویلي چې د چارشنبې په ورځ په ټول لبنان کې د اسراییل په بریدونو کې ۸۹ تنه وژل شوي او ۷۰۰ ټپیان دي. ویاند زیاته کړه چې پر جنوبي لبنان په بریدونو کې ۱۲ طبي کارکوونکي هم وژل شوي دي.
د اسراییل پوځ ویلي چې دا د جګړې تر ټولو ستر همغږی برید و.
د راپور له مخې، په دغو بریدونو کې د حزبالله د قومندانۍ له ۱۰۰ ډېر مرکزونه او پوځي ځایونه په نښه شوي دي.
په بیروت کې د رویټرز خبریالانو ویلي، چې خلکو په موټرسایکلونو ټپیان روغتونونو ته وړل، ځکه امبولانسونه په کافي اندازه نه وو.
له دې وړاندې د پاکستان لومړي وزیر ویلي وو، چې د امریکا او ایران په اوربند کې لبنان هم شامل دی، خو د اسراییل لومړي وزیر ویلي، چې په لبنان کې به ددوی بریدونه جاري وي.
