د سوېلي وزیرستان خلکو په سیمه کې د روغتیايي اسانتیاوو د نشتوالي له امله محکمې ته عریضه کړې
د سوېلي وزیرستان قبایلي سیمې ګڼ شمېر اوسېدونکو د روغتیايي اسانتیاوو د نشتوالي له امله د پېښور سترې محکمې ته مراجعه کړې او هلته یې پر ټولو روغتیایي اسانتیاوو سمبال د یوه مرکزي روغتون د جوړولو غوښتنه کړې ده.
عریضه کوونکو ويلي، چې په سوېلي وزیرستان کې د اړینو روغتیايي اسانتیاوو نشتوالي ځايي خلک له بنسټیزو حقونو بېبرخې کړي دي. دوی له محکمې غوښتنه کړې، چې په سوېلي وزیرستان کې د مناسبو روغتیايي اسانتیاوو نهورکړه دې ناقانونه او د خلکو له اساسي حقونو سرغړونه وبولي.
دوی دارنګه غوښتنه کړې، چې د ایالتي حکومت په ګډون دې اړونده ادارو ته لارښوونه وشي؛ ترڅو د ښځینه ډاکټرانو، اړینو درملو او اړینو طبي تجهیزاتو په ګډون د وړو او متخصصو ډاکټرانو حضور ډاډمن کړي.
عریضه کوونکو ویلي، په ولسوالۍ کې د طب عدلي څانګه نهشته چې له امله یې اوسېدونکي اړ شوي چې جسدونه د عدلي طب معایناتو لپاره نورو ولسوالیو ته ولېږدوي چې د ځنډ، د عدلي شواهدو خرابېدل او د عدالت پلي کېدو کې یې جدي خنډونه رامنځته کړي.
دوی وایي، په بېړنیو حالاتو کې خلک اړ شوي چې د پنځو څخه تر اوو ساعتونو پورې ډېر مزل وکړي.
