د طالبانو د بهرنیو چارو وزارت ویاند د یوې اعلامیې په په ترڅ کې ویلي، چې په ارومچي کې له پاکستان سره د چین په منځګړتوب خبرې په رغنده فضا کې وشوې او د دوه اړخیزو اړیکو، امنیتي او سیمهییز ثبات اړوندو مسایلو په اړه هر اړخیز بحثونه وشول.
ددغه وزارت ویاند عبدالقهار بلخي د چارشنبې په ورځ، د وري پر ۱۹مه، پر اېکس ولیکل، چې د چین ولسي جمهوریت په کوربهتوب او منځګړیتوب له پاکستاني پلاوي سره په ارومچي ښار کې ترسره شوې رسمي خبرې اترې، پای ته ورسېدې.
نوموړې زیاته کړې، چې «یادې خبرې په رغنده فضا کې ترسره شوې، چې پکې د دوه اړخیزو اړیکو، امنیتي موضوعاتو، او د سیمهییز ثبات اړوندو مسایلو په اړه هر اړخیز بحثونه وشول».
د طالبانو د بهرنیو چارو وزارت د چین له ښه نيت او کوربهتوب مننه کړې او هیله یې ښودلې، چې دغه بهیر به د باورجوړونې، دوامدارو اړیکو، تفاهم او اغیزناکو همکاریو د لا پیاوړتیا لامل شي.
