د دوو اوونیو اوربند له اعلان وروسته د تېلو بیې راټیټې شوې
د سيبياېس خبري شبکې راپور ورکړی، چې د مالي بازارونو وضعیت له یوې میاشتې جګړې وروسته چې د تېلو نړۍوالې سوداګرۍ ته یې زیان رسولی و، د چهارشنبې په سهار د متحده ایالاتو، اسراییل او ایران ترمنځ د دوه اوونیز اوربند د خبر له اعلان وروسته د ښه والي نښې وښودې.
یادې رسنۍ لیکلي، چې د «اېسانډپي ۵۰۰» راتلونکې معاملې د سېشنبې تر ناوخته (د امریکا د ختیځ په وخت د شپې ۱۰:۳۰ بجې) ۲.۳ سلنه زیاتې شوې دي. د اسیا بازارونو هم په سهارنیو معاملو کې د پام وړ پرمختګ لاره، چې له مخې یې د توکیو د «نیکي ۲۲۵» شاخص ۵.۱ سلنه او د هانګ کانګ د «هانګسنګ» شاخص ۲.۴ سلنه لوړ شو.
د تېلو بیې هم د اوربند له اعلان وروسته راټیټې شوې؛ په متحده ایالاتو کې د وېسټ ټېکساس انټرمیډیټ شاخص ۱۴.۳ سلنه ولوېد او د هر بېرله بیه نږدې ۹۷ ډالرو ته ورسېده. همدارنګه د برنېټ خامو تېلو نړۍوال شاخص ۱۳.۱ سلنه راښکته شو او شاوخوا ۹۵ ډالرو ته راغی.
له دې سره، بیې لا هم د جګړې له پیل وړاندې کچې پرتله لوړې پاتې دي. د جګړې له پیل یوه ورځ وړاندې، وېسټ ټېکساس انټرمیډیټ نږدې ۶۷ ډالره او برنېټ شاخص ۷۲ ډالره في بېرله معامله کېدل.
