په پاکستان کې د جمعیت علمای اسلام د جمعې ورځې لاریون په اسلاماباد کې د امریکا او ایران تر منځ د سولې د پیلېدونکو خبرو له امله ځنډول شوې دي. دغه لاریون د پاکستان حکومت له لوري د نفتي موادو د بیو د لوړولو او همداراز د بهرني پالیسۍ پر وړاندې د غبرګون ښودنې په موخه پلان شوی وو.
د پاکستان د جمعیت علمای اسلام د چهارشنبې په ماښام (د وري ۱۹مه) د یوې خبرپاڼې په خپرولو سره ویلي، دغه لاریون د پاکستان د حکومت په غوښتنه ځنډول شوی دی.
د خبرپاڼې لهمخې، د پاکستان د کورنیو چارو وزیر محسن نقوي او ځینې نور چارواکي د جمعیت علماي اسلام د مشر مولانا فضل الرحمن استوګنځي ته ورغلي او له هغه یې غوښتي چې په اسلاماباد کې د امریکا او ایران تر منځ د سولې خبرو د پیلېدو له امله د راتلونکې جمعې ورځې لاریون وځنډوي.
خبرپاڼه کاږي: «د پاکستان لومړي وزیر له جمعیت علماء اسلام څخه غوښتنه وکړه، چې له سبا ورځې څخه په اسلاماباد کې د ایران او امریکا په ګډون د نړۍ له بېلابېلو هېوادونو څخه مېلمانه راځي او د اوربند د خبرو د وروستي کولو هڅې به نورې هم مخ ته یوړل شي؛ له همدې امله جمعیت علمای اسلام باید د جمعې ورځې اعلان شوې مظاهرې وځنډوي څو نړۍ ته یو مثبت پیغام واستول شي».
په خبرپاڼه کې راغلي، مولانا فضل الرحمن له خپلو ګوندي ملګرو سره له سلا مشورو وروسته، په اسلاماباد کې د سولې د خبرو لپاره د «حسن نیت» او د حکومت د دې ډاډ په اساس چې د پټرول د بیو په کمولو سره به د ولس اندېښنې حل شي، د جمعې په ورځ په ټول هېواد کې پلان شوې احتجاجي مظاهرې وځنډولې.
د خبرپاڼې پر بنسټ، د پاکستان یاد حکومتي پلاوي ډاډ ورکړی، چې په راتلونکو څو ورځو کې به د پټرول بیې راټیټې کړل شي.
د پاکستان د جمعیت علمای اسلام همداراز یادونه کړې، چې ۴ ورځې وروسته به په مردان کې یوه لویه ولسي غونډه راوبولي او هلته به خپله نوې کړنلاره اعلان کړي.
