رویټرز خبري اژانس راپور ورکړی، سره له دې چې سپینه ماڼۍ په امریکا کې د ځینو اهدافو پر وړاندې د ایران ګواښونه کم ارزښته بولي؛ خو اېفبيای تېره میاشت ایالتي او سیمهییزو پولیسو ته د دغه ګواښونو د کچې د لوړېدو په اړه خبرداری ورکړی و.
د رویټرز د راپور لهمخې؛ اېفبيای او یوشمېر نورو امریکایي استخباراتي ادارو د ۱۴۰۴کال د کب په ۲۹مه په یوه استخباراتي راپور کې خبرداری ورکړ، چې د ایران حکومت د امریکایي نظامي او دولتي تاسیساتو، یهودي او اسراییلي بنسټونو او په متحده ایالاتو کې د ایراني مخالفانو لپاره یو «دوامداره ګواښ» ګڼل کېږي.
د اېفبيای دغه راپور د ملي امنیت د روڼتیا په برخه کې د یوې فعالې غېرانتفاعي ادارې «Property of the People» لهخوا د عامه اسنادو د لاسرسي د غوښتنو له لارې ترلاسه شوی او رویټرز ته سپارل شوی دی.
په دغه راپور کې په امریکا کې د هغو اهدافو پر وړاندې د «فزیکي ګواښونو د زیاتېدو احتمال» یادونه شوې، چې ښايي د یادې جګړې له پیلېدو وروسته د ایران د حکومت لهخوا په نښه شي.
په راپور کې راغلي: «تاوتریخوالي ته لېواله افراطیان چې بېلابېل اېډیالوژیک شالیدونه لري، د هغو کسانو په ګډون چې له امریکا یا اسراییل سره مخالفت لري؛ ښايي دغه شخړه د تاوتریخوالي د ترسره کولو لپاره د توجیه په توګه وکاروي».
په دغه راپور کې همداراز ویل شوي، چې د ایران امنیتي ادارو په وروستیو کلونو کې د امریکایانو د تښتولو او وژلو هڅې کړې دي. د راپور لهمخې، که څه هم په امریکا کې ډېری پلانونه د وسلې په کارولو ولاړ وو؛ خو په نورو لارو چارو کې «د چړو برید، په موټر وهل، بم اېښودنه، مسمومول، زندۍ کول، د ساه بندول او په قصدي ډول اور اچول» هم شامل وو.
په دغه راپور کې راغلي، ایران غوره ګڼي هغه عملیاتي کسان وکاروي چې په امریکا کې مېشت دي. همدارنګه، د ایران حکومت په تېر کې له خواله رسنیو، ژوندۍ بڼه خپرونو او د نقشې له اپلکېشنونو څخه د اهدافو د ټاکلو او امنیتي تدابیرو د ارزونې لپاره کار اخیستی او د هک کولو له لارو لکه «فیشېنګ برېښنالیکونو» څخه یې هم ګټه پورته کړې ده.
د راپور په دوام کې راغلي، چې د ایران حکومت «دارنګه هڅه کړې قربانیان نورو هغو هېوادونو ته وکاږي، چې له جغرافیایي پلوه ایران ته نږدې دي چې دا کار تر ډېره د هغوی د تښتولو او په پای کې د اعدامولو په موخه شوی دی».
دغه راپور د امریکا امنیتي ځواکونو ته خبرداری ورکړی، چې د احتمالي ګواښونو پر وړاندې ویښ واوسي او د اندېښنې وړ معلومات له فدرالي ادارو سره شریک کړي.
رویټرز وايي، چې د امریکا ولسمشر ډونالډ ټرمپ په وروستیو میاشتو کې د استخباراتي ارزونو په غبرګون په امریکا کې د ایران د حکومت د احتمالي بریدونو موضوع په ښکاره توګه کمه ارزولې ده. هغه تر دې وړاندې له سپینې ماڼۍ څخه بهر د یوې پوښتنې په ځواب کې چې ایا په امریکا کې د ایران له احتمالي برید څخه اندېښمن دی، وویل: «نه، اندېښمن نه یم».
