په دوو اونيو کې؛ په خیبر پښتونخوا او بلوچستان کې د سختو ورښتونو له امله ۶۳ کسان مړه شوي
په تېرو دوو اونيو کې په خیبر پښتونخوا او بلوچستان کې د سختو ورښتونو له امله ۶۳ کسان مړه او ۱۳۳ نور ټپیان شوي دي. له دې سره سم د ناورينونو مدیریت اداره وايي، چې د یادو ورښتونو له کبله په خیبر پښتونخوا کې ۶۵۲ او په بلوچستان کې بیا ۱۶۱ کورونو ته زیان اوښتی دی.
د خیبر پښتونخوا د ناورينونو مدیریت ادارې ويلي، چې د تېرې سېشنبې په ورځ په پېښور او مومندو والسوالیو کې ګڼ شمېر خلک چې د سېلاب په اوبو کې بند پاتې وو ژغورل شوي. بل لور ته د خیبر پښتونخوا د اوبو لګولو ادارې ويلي، چې د افغانستان سیندونو کې اوبه زیاتې شوې او د سېلاب بڼه يې خپله کړې او دا مهال د پاکستان شاوخوا سیمو ته نږدې شوې او ښایي چې دغه هېواد ته داخلې شي او د پراخو زیانونو لامل شي.
د پاکستان د ناورینونو مدیریت ادارې تر دې وړاندې خبر ورکړی و، چې د تېرې مارچ میاشتې له ۲۵مې نېټې راهیسې په خیبر پښتونخوا کې د پرلهپسې ورښتونو له امله ۳۰ کسان مړه او ۸۵ نور ټپیان شوي دي. د یادې ادارې په وینا؛ په مړو شویو کسانو کې ۲۰ ماشومان، ۵ نارینه او ۵ ښځې شاملې دي.
