په نورستان کې د طالبانو د والي ویاند فریدون صمیم هغه راپورونه رد کړل، چې ګواکې پاکستان د کامدېش او برګمټال لارې تړلې دي. هغه د طالبانو تر واک لاندې له «حریت» راډیو سره په تازه مرکه کې ویلي، پاکستاني ځواکونه له ډیورنډ کرښې نهدي اوښتي او هغوی ته د اوښتو اجازه هم نه ورکول کېږي.
نوموړی دغه څرګندونې داسې مهال کوي، چې تر دې وړاندې افغانستان انټرنشنل-پښتو راپور ورکړی و چې د کامدېش او برګمټال لارې پر موټرو د پاکستاني ځواکونو د ډزو له امله تړل شوې دي.
له دې سره دوه ورځې وړاندې هم ځینو باخبره ځايي سرچینو ویلي و، چې د کونړ ولایت د ناړۍ اړوند په بري کوټ سیمه کې او د نورستان په کامدېش او برګمټال ولسوالیو کې پر ډیورنډ کرښه پوستې خالي پرتې دي. سرچینو همداراز وویل، چې د ناړۍ د بري کوټ او د نورستان د کامدېش او برګمټال ولسوالیو د لارو بندېدو لامل هم همدا دی.
په سیمه کې ځایي سرچینو افغانستان انټرنشنل-پښتو ته ویلي، چې کامدېش، برګمټال او د کونړ ناړۍ ولسوالۍ پر یوه لیکه پرتې دي او د نورستان خلک د اکمالاتو لپاره د ناړۍ لار کاروي؛ خو پاکستاني ځواکونه له غره څخه ډزې کوي او پر لاره موټر نهشي تېرېدای.
په نورستان کې د طالبانو د والي ویاند فریدون صمیم په دغه تازه مرکه کې د لارو د بندېدو اصلي لامل ته اشاره ونهکړه؛ خو وايي که څه هم دوی پر بدیلو لارو کار پیل کړی، خو په هېواد کې د وروستیو ورښتونو او واورو له امله لارې لاهم تړلې پاتې دي.
هغه منلې، چې د نورستان په کامدېش او برګمټال ولسوالیو کې خلک د درملو او خوراکي توکو له کمښت سره مخ دي؛ خو وايي اړونده ادارې هڅه کوي، چې دغه ستونزو ته رسېدنه وکړي.
فریدون صمیم وایي: «په جګړه کې خواږه نه وېشل کېږي؛ په جګړه کې به لارې هم بندېږي او ستونزې به هم راځي. ولس ته ډاډ ورکوو، چې هر څه ته به رسېدګي وشي؛ تر اوسه کامدېش او برګمټال ته څلور ټنه درمل رسول شوي او ناروغان په چورلکو کې ننګرهار ته لېږدول شوي دي. د دې ترڅنګ، تېره ورځ په کامدېش کې له ۷۱۷ کورنیو سره د خوراکي توکو مرسته شوې او د بدیلو لارو لپاره هم هڅې روانې دي».
د یادولو وړ ده، چې له دوو میاشتو راهیسې د کامدېش او برګمټال لارې تړلې دي چې له امله یې د دغه ولسوالیو اوسېدونکي د خوراکي توکو او درملو له سخت کمښت سره مخ شوي دي.
له بل پلوه د ملګرو ملتونو د بشري مرستو د همغږۍ دفتر (اوچا) وايي، چې د نورستان په برګمټال او کامدېش ولسوالیو کې شاوخو ۱۰۰زره کسان بشري مرستو ته لاسرسی نهلري.
اوچا د دوشنبې په ورځ (د وري ۱۷مه) ویلي، که څه هم دغه ولسوالیو ته د کونړ ولایت د ناړۍ ولسوالۍ له لارې تګراتګ شونی دی؛ خو دغه لاره هم د ډیورنډ کرښې له هغې غاړې څخه د ډزو له امله د ملکي وګړو او مرستندویو بنسټونو پرمخ تړلې ده.
