ملګرو ملتونو پر لبنان د اسراییل بریدونه وغندل او د جګړې د سملاسي درولو غوښتنه یې وکړه

ملګرو ملتونو خبرداری ورکړی، چې د ایران او امریکا ترمنځ د اعلان شوي اوربند په لړ کې په لبنان کې د پوځي عملیاتو دوام کولای شي اوربند په جدي توګه له ګواښ سره مخ کړي او په سیمه کې د تلپاتې سولې د ترلاسه کولو هڅې زیانمنې کړي.
ګوترېش یو ځل بیا په ټولو خواوو غږ کړی، چې سملاسي جګړه پای ته ورسوي. هغه ټینګار کړی، چې پر ملکي وګړو او ملکي اهدافو بریدونه د منلو وړ نه‌دي. هغه زیاته کړې، چې دغه کړکېچ «پوځي حل نه‌لري» او دواړه خواوې باید له ډیپلوماټیکو لارو کار واخلي.

تر دې وړاندې د لبنان د روغتیا وزارت ویاند رویټرز ته ویلي و، چې د چهارشنبې په ورځ په ټول لبنان کې د اسراییل په بریدونو کې ۸۹ کسان وژل شوي او ۷۰۰ نور ټپیان دي. هغه زیاته کړې وه، چې پر سویلي لبنان په بریدونو کې ۱۲ روغتیایي کارکوونکي هم وژل شوي دي.