د بلوڅانو د یووالي غورځنګ مشرې ماهرنګ بلوڅ ویلي، د دوی د فعالیتونو له امله يې کورنۍ ځورول کېږي. د پاکستان په زندان کې دغه زنداني فعاله وایي:« زه له یوه کال راهیسې په انفرادي بند خونه کې یم. دلته چوپتیا یو داسې دروندوالی لري، چې څومره ورسره پاتې شې هغومره پر تا فشار راوړي».
هغې زیاته کړې:« یوازیتوب زه له نړۍ جلا کړې یم او داسې احساس راکوي، لکه وخت چې درېدلی وي؛ خو تر ټولو لوی درد دا دی، چې زما کورنۍ زما د سیاسي فعالیتونو له امله هدف ګرځول کېږي».
نوموړې دغه څرګندونې په زندان کې د هغې د يو کال پوره کېدو په اړه په خپلې هغه لیکنه کې کړې، چې د برتانوۍ ورځپاڼې ګارډین لهخوا خپره شوې ده.
د بلوڅانو د یووالي غورځنګ د څو کالو راهیسې په بلوچستان کې د بشري حقونو د خوندیتوب لپاره فعالیت کوي، د پاکستان حکومت په تېر ۲۰۲۵کال کې د یوه پرلت پرمهال د یاد غورځنګ د مشرې ماهرنګ بلوڅ په ګډون د دغه غورځنګ ګڼ مشران ونیول او له یو کال راهیسې په زندان کې دي او د کویټې په محکمه کې يې قضیه روانه ده.
په دې اړه مدافع وکیل عمران بلوڅ افغانستان انټرنشنل پښتو ته وويل:« د یوه وکیل په توګه؛ بلکې د یوه داسې انسان په توګه چې پر بشري حقونو باور لري، په شعوري ډول باور لرم چې د دغه قضیې په ترڅ کې ځایي او نړۍوال قوانین په بشپړ ډول له پامه غورځول کېږي».
نوموړي زیاته کړه، په دغه قضیه کې د انصاف غوښتنې نه پوره کېږي؛ بلکې ډېرو حکومتي استازو په خپلو مرکو کې د یادې قضیې یادونه کړې ده، چې له امله یې د عدالت معیارونه تر پوښتنې لاندې راغلي او د یادې قضیې په اړه شکونه پیدا کوي.
عمران بلوڅ په بلوچستان کې د بشري حقونو د سرغړونو په اړه وويل، چې د بشري حقونو او اساسي قانون وضعیت په بلوچستان کې یوازې د تېرو څو کلونو نه؛ بلکې له لسیزو راهیسې کړکېچن دی.
هغه وایي، کله چې خلکو ته اجازه نه ورکول کېږي چې د خپلو اساسي، قانوني او بشري حقونو په اړه خبرې وکړي او مبارزه وکړي، رسنۍ ازادې نه وي، خلک په زور بېدرکه کېږي، له محکمې پرته سزاوې ورکول کېږي؛ نو حالات به حتماً خراب وي.
بل لور ته ماهرنګ بلوڅ په خپله لیکنه کې ويلي، چې د دوی غورځنګ تل د سولهییزې مبارزې ملاتړ کړی؛ خو بیا هم د دوی قضیه د زندان دننه اورېدل کېږي او تر ډېره د شنبې په ورځ کله چې نور خلک د قضیې اورېدلو ته نهشي تلای؛ اورول کېږي او په زندان کې پر ټیلیفوني اړیکه هم پر موږ بندیز دی. که څه هم د زندان د اصولو له مخې په اونۍ کې دوه ځله له کورنۍ سره د خبرو کولو اجازه شته».
د بشري حقونو کمېسیون د بلوچستان څانګې مرستیال مشر کاشف پانیزي په دې اړه افغانستان انټرنشنل پښتو ته وويل:« کله چې د قضیې ګواه محکمې ته نه حاضرېږي؛ نو په قانون کې دا شته چې په زندان کې دې قضیه واورول شي؛ دا چې د انصاف تقاضا څومره په ځای کېږي په دې هکله څه نه شو ويلای».
نوموړي په بلوچستان کې د بشري حقونو روان وضعیت په اړه وويل، دلته چا ته اجازه نهشته چې غږ پورته کړي. بل لور ته ماه رنګ بلوڅ ادعا کړې، چې په بلوچستان کې هیڅ کور خوندي نهدی په زوره بېدرکه کېدل زیات شوي او ۱۲۰۰ پېښې رامنځته شوې دي.
