افغان سوک وهونکې فرشته خاني یو ځل بیا وځلېده او د سرو زرو مډال یې وګاټه. هغې د پاکستان د سوک وهنې په ملي لوبو کې اتلولي خپله کړه. په دغه سیالۍ کې د سند، پنجاب او اسلاماباد په ګډون د پاکستان د بېلابېلو ښارونو ورزشکارانو پهکې برخه اخیستې وه.
خاني په دغه سیالۍ کې چې د پاکستان د سند ایالت په حیدراباد ښار کې ترسره شوه، د ۵۰ کیلوګرام وزن په کټګورۍ کې خپلو ټولو سیالانو ته ماتې ورکړه او د سرو زرو مډال یې وګاټه. سره له دې چې د هغې ځینو سیالانو (تر ۵۵ کیلوګرامه پورې) په لوړو وزنونو کې سیالي کوله، فرشته خاني وکولای شول چې د غوره فعالیت سره خپله غوره والی ثابت کړي.
د هغې په وینا؛ دغه سیالۍ نږدې یوه اونۍ دوام وکړ او د پاکستان له ۲۰ څخه د زیاتو ښارونو او سیمو لوبغاړو پهکې برخه اخیستې وه.
