د جرمني لومړی وزیر: موږ نه غواړو چې د ایران او امریکا د جګړې له امله ناټو ووېشل شي
د جرمني لومړي وزیر فریدرېښ مېرڅ ناټو په اروپا کې د امنیت تضمینونکی سازمان بللی دی او ټینګار یې کړی، چې د امریکا او ایران ترمنځ جګړې له امله باید د واشنګټن او اروپايي متحدینو ترمنځ اړیکې نورې ترینګلې نه شي.
مېرڅ د پنجشنبې په ورځ خبریالانو ته ویلي، نه غواړي چې د امریکا او ایران ترمنځ اوسنۍ کړکېچ د ناټو د غړو هېوادونو ترمنځ د درز لامل شي.
نوموړي زیاته کړې:«موږ نه غواړو، زه نه غواړم چې ناټو ووېشل شي. ناټو زموږ د امنیت، په ځانګړي ډول په اروپا کې د امنیت تر ټولو ستر تضمینونکی دی».
همدارنګه نوموړي ویلي، چې د امریکا ولسمشر ډونالډ ټرمپ یې له ایران سره خبرو کولو ته هڅولی دی.
د جرمني لومړي لومړي وزیر ویلي، چې هېواد یې په منځني ختیځ کې د کړکېچ هوارۍ په موخه د ایران له مشرتابه سره مستقیمې خبرې پیل کړې دي.
